Трамптың ізін кім басатыны айтыла бастады

БАҚ мәліметінше, АҚШ басшысы бұл мәселеде жақын кеңесшілерімен ақылдасып, екі негізгі кандидаттың арасынан таңдау жасауда.

Әңгіме қазіргі вице-президент Джей Ди Вэнс пен АҚШ мемлекеттік хатшысы Марко Рубио туралы болып отыр. Ақпарат көздерінің хабарлауынша, Трамп аталған екі саясаткерден құралған тандем нұсқасын жиі талқылай бастаған және кеңесшілерінен болашақта Республикалық партияны кім басқаруы тиіс екенін сұрауда.

Президентке жақын кеңесшілердің бірі 2028 жылға арналған «арман тандем» Вэнс пен Рубио екенін, әрі бұл жұпта көшбасшы рөлін Джей Ди Вэнс атқаруы мүмкін екенін айтқан. Сонымен қатар, Марко Рубио – Джей Ди Вэнс форматы да Трамп үшін қолайлы нұсқа бола алатыны атап өтіледі.

Басылымның жазуынша, Джей Ди Вэнстің 2028 жылғы сайлауға қатысуы мүмкін деген жағдайда оның президенттік кампаниясын жүргізуге дайын саяси кеңесшілер тобы бар. Яғни, оның сайлауалды инфрақұрылымы қалыптасқан. Ал Марко Рубиода мұндай толыққанды құрылым әзірге жоқ. Соған қарамастан, ол Джей Ди Вэнс кандидатурасын қолдауға дайын екенін білдірген.

Сарапшылардың пікірінше, Трамптың бұл қадамдары Республикалық партия ішіндегі ықтимал күштер теңгерімін айқындауға бағытталған және 2028 жылғы сайлау науқанына дайындықтың алғашқы белгілерінің бірі болуы мүмкін.