ЦАХАЛ: "Хезболла" Израильге 250-ге жуық зымыранмен шабуыл жасады

Қозғалыс өкілдері  Израильдің оңтүстігіндегі Ашдод әскери-теңіз базасына "пилотсыз ұшақтардың көмегімен" алғаш рет әуе шабуылын жасағанын айтты. Хезболланың мәліметінше, зымырандар мен пилотсыз ұшақтар Тель-Авивтегі «әскери нысанаға» да тиген. Сонымен қатар, Израильдің Тель-Авив қаласының шетіндегі Глилот әскери барлау базасына зымыран атылды.

Израиль әскерилері нақты нысандар туралы ақпаратқа түсініктеме бермеді.

Кемінде 11 адам зардап шекті, деп хабарлайды AFP медициналық мекемелерге сілтеме жасап.

Тель-Авив маңындағы Петах Тиквадан түсірілген кадрларда бүлінген және өртенген көліктер, сондай-ақ қираған үй көрінеді.

Ливан армиясының орталығына шабуыл

Сонымен қатар, AP агенттігінің хабарлауынша, Израильдің Ливан армиясының орталықтарының біріне жасаған шабуылы салдарынан бір сарбаз қаза тауып, 18-і жараланған.

Израиль әскерилері бұл оқиғаға өкініш білдірді және шабуылдың Хезболлаға қарсы ұрыс аймағында жасалғанын және қозғалыс жауынгерлерінің Ливан әскерилерінің нысанасы болмағанын хабарлады.

Израиль мен Хезболла арасындағы қақтығыстар басталғалы бері Израильдің соққылары нәтижесінде 40-тан астам ливандық сарбаз қаза тапқан.

Боррел Еуроодақтың Израильмен диалогын тоқтатуды ұсынды

ЕуроОдақтың сыртқы істер жөніндегі жоғары өкілі Жозеп Боррел ЕО-ға мүше елдерге Израильмен тұрақты саяси диалогты тоқтатуды ұсынады. Бұған негіз ретінде бұрын жарияланған тәуелсіз халықаралық ұйымдардың баяндамаларында Израиль адам құқықтары мен халықаралық гуманитарлық құқықты бұзып отырғаны айтылған, деп хабарлады Еуропалық Одақтың Брюссельдегі өкілдері.