Тұрғындарға арналған жаңа демалыс аймақтары мен жайлы аулалар: бір жылда Сарыарқа ауданында атқарылған абаттандыру жұмыстары

 Тұрғындардың өмір сапасын арттыру мақсатында 2025 жылы ауданда ауқымды абаттандыру, көгалдандыру және қалалық инфрақұрылымды жаңарту жұмыстары жүргізілді. Бұл туралы қала әкімдігінің ресми сайты хабарлады.

Биыл ауданда сүрілген гараждар, ескі үйлер мен бос жатқан аумақтардың орнына алты жаңа қоғамдық кеңістік пайда болды. Абаттандырылған аумақтың жалпы көлемі 18 мың шаршы метрден асты. Барлық жобалар маңайдағы үйлер тұрғындарының ұсыныстары ескеріле отырып әзірленген.

Атап айтқанда, бұрын тұрғын үй орналасқан Алтынемел мен Гёте көшелерінің қиылысында аумағы 2 мың шаршы метрден асатын, жарықтандырылған әрі қауіпсіз демалыс аймағы салынды. Ал Ы. Дүкенұлы көшесі мен Республика даңғылының қиылысындағы «Иллюзия» сквері толық жаңартылып, оның аумағы 5,8 мың шаршы метрден асты. Мұнда жаңа жаяу жүргінші бағыттары, заманауи жарықтандыру мен абаттандыру элементтері орнатылып, тәулік бойы серуендеуге қолайлы кеңістік қалыптастырылды.

Сондай-ақ Республика даңғылы, 7/1 мекенжайында жаңа қоғамдық алаң ашылып, Қарасай батыр көшесі, 16 және Жамбыл көшесі, 8 мекенжайларындағы бос жатқан жерлер ретке келтірілді.

Тарихи маңызы бар Гёте, А. Мәмбетов және Ғұмар Қараш көшелерін жаңартуға да ерекше көңіл бөлінді. Бұл көшелерде жаңа жарық шамдары мен заманауи көше жиһаздары орнатылды.

Қалалық ортаны кешенді жаңартудың айқын үлгісінің бірі — Н. Тілендиев даңғылының Көктал көшесінен Астрахан тас жолындағы көпірге дейінгі бөлігі. Мұнда абаттандыру, көгалдандыру және жаяу жүргінші инфрақұрылымын жақсарту жұмыстары қатар жүргізілді.

Аудан әкімдігінің мәліметінше, жолдың бөлгіш жолағында бұрынғы тас төсемнің орнына жасыл дәліз қалыптастырылды. Жоба аясында 510-дан астам жапырақты қарағаш және 44 мыңнан аса сәндік бұта отырғызылды. Бұл шешім шаң мен шуды азайтып, ауаның сапасын жақсартып, даңғылды жаяу жүргіншілер мен жүргізушілер үшін анағұрлым қолайлы етті.

Абаттандыру жұмыстары Е. Рахмадиев атындағы филармония алдындағы алаңды да қамтыды. Мұнда жаяу жүргінші жолдары толық жаңартылып, тактильді плиталар төселіп, кедергісіз орта қалыптастырылды. Алаң заманауи көше жиһазымен, жаңа жарық шамдарымен, жергілікті суару жүйесімен және қосымша көгалдандырумен толықты.

Жыл бойы ауданда 52 аула абаттандырылды, оның 36-сы «Халық қатысатын бюджет» жобасы аясында жүзеге асқан. Жалпы алғанда 20 мың шаршы метрден астам аула аумағы ретке келтірілді. Бұл жерлерде балалар ойын кешендері, спорт алаңдары орнатылып, демалыс аймақтары мен жарықтандыру жүйелері жаңартылды. Аулалар барлық жас санатындағы тұрғындарға қолайлы әрі ашық кеңістікке айналды.

Сонымен қатар, аудан бойынша 263 аулада жөндеу-қалпына келтіру жұмыстары жүргізіліп, әткеншектер, сырғанақтар және өзге де шағын сәулеттік формалар жаңартылды.

Еске салайық, 2025 жылы Астана қаласында барлығы 170 аула мен қоғамдық кеңістік (саябақтар, скверлер, бульварлар) абаттандырылып, жұмыстар қаланың барлық аудандарын, соның ішінде тұрғын алаптарды да қамтыды.