Түркістандық полицейлер атқа қонды

Облыстық Полиция департаменті баспасөз қызметінің хабарлауынша, тәртіп сақшылары Қазығұрт ауданында күнделікті жол қауіпсіздігін қамтамасыз етіп, рейдтік-профилактикалық іс-шараларды өткізіп отырады. Бүгінде 8 полиция қызметкері атқа мініп, Қазығұрт ауданын кесіп өтетін Алматы-Термез-Ташкент  республикалық маңызы бар тас жолда қызмет етеді. Олар жолдың маңайындағы жайылып жүрген және жолға шығып кеткен малдарды айдап, болуы мүмкін келеңсіз жәйттардың алдын алады. Сонымен қатар үй жануарларының қатысуымен болатын жол-көлік оқиғаларының алдын алу мақсатында, иесіз жайылып жүрген малдарды қамау орындарына алып барады.

Бүгінде қараусыз жүрген 40 мал иесіне қатысты Әкімшілік құқық бұзушылық Кодексінің 408-бабы «Ауыл шаруашылығы жануарларын жаю қағидаларын, иттер мен мысықтарды асырау және серуендету қағидаларын, қаңғыбас иттер мен мысықтарды аулау және жою қағидаларын бұзу» бойынша  тиісті шаралар көрілуде.