Түркиядағы наразылық: 1900-ге жуық адам қамауға алынды

Түркияда Стамбұл мэрі Экрем Имамоғлының қамауға алынуы жаппай наразылық шерулерінің басталуына түрткі болды. Түркияның ішкі істер министрі Али Ерлыкая 27 наурызда мәлімдеме жасап, 19-25 наурыз аралығында Түркия билігі 1879 адамды қамауға алғанын хабарлады.

Министрдің мәліметінше, ұсталғандардың 260-ы әлі тергеу изоляторында отыр, 662 адамның ісі сотта қаралып жатыр, ал 489 адам уақытша босатылған.

Наразылық акциялары барысында 150-ге жуық полиция қызметкері жарақат алған. Құқық қорғау органдары шерушілерге қарсы күш қолданған. 27 наурызда полиция Анкарадағы Таяу Шығыс техникалық университетінде өткен студенттік шеруді күшпен таратты. Бұл кезде студенттер мәлімдеме жасауға дайындалып жатқан, бірақ полиция олардың жиналуына рұқсат бермеді. Полиция шерушілерді тарату үшін су атқыштар, көзден жас ағызатын газ және пластик оқтар қолданған.

Бұл наразылықтар Түркиядағы билікке қарсы күрестің күшейгенін көрсетеді. Елдегі оппозиция өкілдері билікті демократиялық құндылықтарды бұзып, оппозиция мүшелерін қуғындады деп айыптауда. Сондай-ақ, халық арасында мемлекеттік басқару құрылымындағы өзгерістерге, оның ішінде мәрдің ұсталуына қатысты да наразылықтар күшейіп келеді.

Түркия үкіметі наразылық шерулерінің алдын алу мақсатында 1 сәуірге дейін жаппай жиналыстарға тыйым салды. Дегенмен, оппозиция өкілдері мен белсенділер бұл шектеулерге қарамастан шерулерді жалғастыруға ниетті екенін айтқан.