Түркістан облысының экс-әкімінің бауыры брокерлік компания ашты

 Бұл туралы Finmentor.kz Telegram-арнасы хабарлады.

Қаржы нарығын реттеу және дамыту агенттігі төрағасының міндетін атқарушының 2026 жылғы 8 қаңтардағы бұйрығымен компанияға №3.1.1.261 лицензия берілген. Құжат «SY Investment Company»-ге Қазақстанның бағалы қағаздар нарығында брокерлік қызметпен айналысуға құқық береді.

Компанияның акционерлері — кәсіпкерлер Айжан Асанова мен Естай Серік. Олар Алматы қаласындағы «Алатау-Құс» құс фабрикасының иелері ретінде белгілі. Сонымен қатар, Естай Серік — кезінде алты жыл бойы Самұрық-Қазына ұлттық әл-ауқат қорын басқарған, Түркістан облысының бұрынғы әкімі Өмірзақ Шөкеевтің туған інісі.

Қаржы нарығында жаңа ойыншының пайда болуы заңды экономикалық құбылыс болғанымен, компания иелерінің ықпалды саяси тұлғамен туыстық байланысы қоғам назарын аудартпай қоймады. Сарапшылар мұндай жағдайларда реттеуші органдардың ашықтығы мен мүдделер қақтығысын болдырмау тетіктері аса маңызды екенін атап өтеді.