Украина дрондары Ресейдің Краснодар өлкесіне шабуыл жасады

Ресми мәліметтерге сәйкес, дрондардың сынықтары Тамань станицасында екі мекенжайға құлаған. Апат салдарынан ешкім зардап шекпеген. Қазір оқиға орнында арнайы және төтенше жағдайлар қызметі жұмыс істеп жатыр.

Сынықтардың бірі Сухое көлі маңында өрттің тұтануына себеп болды, ал Темрюк ауданында бір жеке тұрғын үйге зақым келген. Сонымен қатар, жергілікті тұрғындар кемінде алты жарылыстың дыбысын естігендерін айтып отыр. Белгісіз үлгідегі дронның бір фрагменті "Бланко" қонақүйі маңынан табылған.

Анапа мен Витязево маңында да жарылыстар тіркелді

Анапа қаласында да дрон сынықтары үш жеке үйге зақым келтіргені хабарланды. Витязево ауылында (Анападан шамамен 17 шақырым жерде) тұрғындар аспанда кемінде тоғыз жарылысты естіген. Аудан аумағында әуе шабуылына қарсы қорғаныс (ПВО) жүйесі іске қосылған.

Юровка ауылында дрон фрагменттерінің құлауынан үш үйдің терезелері мен есіктері бүлінген. Цибанобалка ауылында сынықтар ағашқа түсіп, азаматтық инфрақұрылымға зиян келмеген.

Қырым мен Брянск облысында да шабуылдар тіркелді

Украинадан аннексияланған Қырым түбегінің тұрғындары Керчь көпіріне жасалған шабуыл туралы хабарлады.  ASTRA Telegram-арнасы көпірдің уақытша жабылғанын жазды.

Сонымен қатар, Брянск облысының губернаторы Александр Богомаз ПВО жүйесі аймақта алты ұшақ типті дронды атып түсіргенін мәлімдеді. Бұл шабуылда да зардап шеккендер мен қираған ғимарат тіркелмеген.