Украина Грузия билігіне санкция салды

Құжатқа қарағанда, Киевтің санкциясына 19 адам ілінген. Арасында Грузиядағы басқарушы "Грузин арманы" партиясының негізін қалаушы Бидзина Иванишвили, премьер-министр Ираклий Кобахидзе, мемлекеттік қауіпсіздік қызметінің жетекшісі Григол Лилуашвили, ішкі істер министрі Вахтанг Гомелаури, Тбилиси мэрі Каха Каладзе де бар.

Зеленскийдің сөзінше, шектеулер "Грузияның мүддесін сатып, елді Путинге жығып бергендерге" қарсы бағытталған.

"Еуропа мен Американы, әлем елдерін осылай қимылдауға үндейміз" деді телеграм-арнасында Зеленский.

АҚШ мемлекеттік департаменті өз мәлімдемесінде АҚШ Грузияның территориялық тұтастығы мен егемендігін қолдайтынын атап өткен. Екі ел арасындағы әріптестік еркіндік, демократия мен еуроатлантикалық талпыныстарға айнымастыққа негізделгенін айтты.