«Украина қиын жағдайда тұр»: Зеленский еліне мәлімдеме жасады

Оның Telegram каналында жарияланған видеода Зеленский қазіргі сәтті ел тарихындағы ең күрделі кезең деп атады және Украинаға АҚШ президенті Дональд Трамп бекіткен 28 пункттен тұратын бейбіт жоспардың көп бөлігін қабылдауға тура келетінін мойындады.

«Қазір Украина өте қиын таңдау алдында тұр: абыройдан айрылу немесе негізгі серіктесті жоғалту қаупі. 28 күрделі пунктті орындау немесе ең ауыр қыс мезгілін өткеру және болашақтағы тәуекелдер», - деді Зеленский.

Ол Киевтің Вашингтон мен басқа да серіктестерін Украина ұлттық мүдделерін сақтау қажеттілігіне сендіруді жалғастыратынын атап өтті.

«Мен дәлелдер келтіріп, баламалы жолдарды ұсынамын, бірақ Украина бейбітшілікті қаламайды немесе дипломатиялық процесті бұзады деп айтуға еш себеп бермейміз… Мен жоспардағы барлық пункттер ішінде кем дегенде екі негізгі мән — украиндердің абыройы мен бостандығы сақталуын қадағалаймын, себебі бұл біздің тәуелсіздігіміз, жеріміз, халқымыз және болашағымыздың негізі», - деді Зеленский.

Сонымен қатар ол Еуропалық серіктестермен диалог жалғасып жатқанын және Киев олардың түсіністігін көріп отырғанын айтты.

Украина халқын ол «болаттай мықты» деп сипаттады, алайда «ең берік металл да кейде сынуы мүмкін» деп ескертті. Зеленский барлық саясаткерлер мен азаматтарды «саяси ойындарды» тоқтатуға шақырды.