Украина президенті кеңсесінің басшысы Андрей Ермак отставкаға кетті

28 қараша күні Ермактың үйінде тінту жүргізілген

28 қарашада, Ермактың үйінде НАБУ мен САП тергеушілері тінту жүргізген еді. Украиналық БАҚ деректеріне қарағанда, тергеушілер әзірге Ермакқа қандай да бір қылмыс бойынша күдік жариялаған жоқ.

Қай іс бойынша тінту жасалғаны ресми түрде хабарланбады. Алайда дереккөздер тергеу «Мидас» операциясымен байланысты болуы мүмкін екенін айтады. Бұл — энергетика саласындағы көлемді сыбайлас жемқорлық схемаларын тергейтін НАБУ-дың ірі ісі. Оның басты фигуранты — Украинадан кетіп қалған бизнесмен Тимур Миндич, ол президент Владимир Зеленскиймен байланыста болған деп көрсетілген.

Ермак — Зеленскийдің ең ықпалды серіктерінің бірі еді

Андрей Ермак Украина президенті офисін 2020 жылдың ақпанынан бері басқарып келді. Ол Зеленскийдің ең жақын серіктерінің бірі саналып, көптеген украиналық және халықаралық БАҚ оны «елдегі ең ықпалды адамдардың бірі» деп атап жүрген.

Қысым мен талаптардан кейін шешім қабылданды

«Энергоатом» маңайындағы ірі коррупциялық жанжалдан кейін Зеленскийдің оппоненттері ғана емес, өз командасының бір бөлігі де Ермактың қызметтен кетуін талап еткен.

Дегенмен, 20 қарашада «Слуга народа» фракциясымен кездесу кезінде Зеленский Ермакты қызметтен босатпайтынын мәлімдеп, кадрлық шешім президенттің құзырындағы мәселе екенін айтқан.

Соңғы жағдайлардан кейін Ермак өзі отставкаға кету туралы шешім қабылдады.