Украина Ресейдің Брянск химия зауытына Storm Shadow зымырандарымен соққы жасады

Әскери ведомствоның ресми мәліметінше, операция Ресейдің әуе шабуылына қарсы қорғаныс жүйесін айналып өту арқылы жүзеге асқан.

«Құрлық күштері, Әскери-теңіз флоты және Украина қорғаныс күштерінің өзге бөлімшелері бірлесіп Брянск химия зауытына дәл соққы берді. Шабуыл Ресейдің әуе қорғанысы жүйесін айналып өткен Storm Shadow әуе зымырандары арқылы орындалды», — делінген Украина Бас штабының мәлімдемесінде.

Мәлімет жергілікті уақытпен 22:30 шамасында жарияланған. Зардап пен шығын көлемі нақтыланып жатыр.

Әскери маңызы бар зауыт

Украина тарапы Брянск химия зауытын Ресейдің әскери-өнеркәсіп кешеніндегі стратегиялық нысандардың бірі деп атады.

«Бұл кәсіпорында порох, жарылғыш заттар және зымыран отынының компоненттері өндіріледі. Аталған өнімдер Украина аумағына шабуыл жасау үшін пайдаланылып келген», — деп мәлімдеді Украина Бас штабы.

Бұл зауыттың өндірісі соңғы айларда ресейлік әскердің снаряд және зымыран қорының толықтырылуына тікелей ықпал етіп келгені айтылады.

Ресей үнсіз, губернатор басқа шабуылды атады

Брянск облысының губернаторы Александр Богомаз өз Telegram арнасында Украина күштері 21 қазанда «Климовск ауданындағы Вишневый ауылына дрондармен шабуыл жасағанын» хабарлады. Оның айтуынша, екі бейбіт тұрғын жараланған.

Алайда губернатор Брянск химия зауытына жасалған соққы туралы ештеңе айтпады.
Бірнеше сағаттан кейін ол тағы бір хабарлама жариялап:

«Ресей Қорғаныс министрлігінің әуе қорғанысы күштері жаудың 57 дронын атып түсірді, зардап жоқ», — деп жазды.

Екі мәрте ракеталық дабыл жарияланды

Сол күні Брянск облысында екі рет «зымыран қаупі» дабылы қосылған. Біріншісі Мәскеу уақытымен 17:00-де беріліп, бір сағаттан соң тоқтатылған. Екіншісі түнгі 00:30 шамасында қайта жарияланған.

Қазіргі сәтте Ресей билігі Брянск химия зауытына соққы жасалғанын ресми түрде растаған жоқ.

Әскери сарапшылардың пікірінше, Storm Shadow зымыраны — Ұлыбритания өндірісіндегі жоғары дәлдіктегі қанатты ракета, ол 250 шақырымға дейін ұша алады және нысананы аса дәлдікпен жояды. Бұл шабуыл Украина қарулы күштерінің Ресейдің әскери инфрақұрылымына бағытталған соққыларын жаңа деңгейге шығарғанын көрсетеді.

«Брянск химия зауыты – Ресейдің оқ-дәрі өндірісіндегі негізгі түйіндердің бірі. Ондағы жарылыс ресейлік әскердің логистикасына әсер етуі мүмкін», – дейді украиналық әскери сарапшы Андрей Коваленко.