Жазылу
Украина Запорожье бағытында қарсы шабуылға өтті
Украинадағы және ресейлік әскери блогерлерге жақын дереккөздер Запорожье облысында, соның ішінде Запорожье-Днепропетровск облыстары шекарасына жақын тұста және облыс орталығынан оңтүстікте Украина әскерінің бірқатар учаскеде қарсы шабуыл жасағанын хабарлап отыр.
Кейбір бағалауларға қарағанда, операциялар «жергілікті-тактикалық» сипатта болуы мүмкін.
Не болып жатыр?
Украиналық әскери бақылаушы Костянтин Машовец Оңтүстік операция аймағында қарсы шабуыл ұйымдастырылғанын және «белгілі бір нәтиже барын» жазды. Дегенмен, ол бұл әрекеттердің ауқымы шектеулі болуы ықтимал екенін, негізгі мақсат — майдан шебіне «кіріп кеткен» шағын топтарды жою екенін атап өтеді.
Ресей Қорғаныс министрлігіне жақын деп саналатын Rybar арнасы 9 ақпанға қатысты шолуында Гайчур өзені бойында ауыр ұрыстар жүріп жатқанын, Гуляйполе маңында қақтығыстар тіркелгенін жазады. Сол жазбада қиындықтардың бірі ретінде Starlink терминалдарына қатысты «мәселелер» және ұшу жұмыстарына кедергі келтіретін ауа райы аталады.
Starlink пен Telegram факторы: неге маңызды?
Бірнеше дереккөз бұл аймақтағы жағдайға ресейлік бөлімдердің байланысындағы іркілістер әсер етуі мүмкін екенін айтады. Institute for the Study of War (ISW) дерегін келтірген бірқатар БАҚ: Украина күштері Днепропетровск-Запорожье әкімшілік шекарасы маңында «жергілікті және мүмкіндікті пайдаланатын» қарсы шабуылдар жүргізіп, ресейлік әскердегі Starlink терминалдары мен Telegram жұмысына қатысты шектеулерді пайдалануы ықтимал екенін жазады.
Сонымен қатар, Украина тарапы SpaceX-пен Starlink терминалдарын ажырату мәселесін талқылағаны туралы да хабарлар бар – мұның мақсаты Ресей әскерінің «сұр импорт» арқылы алынған құрылғыларын шектеу болуы мүмкін.
Сирский не деді?
Украина ҚК Бас қолбасшысы Александр Сирский Запорожье және Днепропетровск облыстарындағы оператив жағдайды десант-штурм бөлімдері мен штурм полктері командирлерімен талқылағанын мәлімдеді. Ол майдандағы ахуал мен ұрыс динамикасын талдағанын, бөлімдер арасындағы өзара іс-қимыл және басқару мәселелері қаралғанын атап өткен.
Ресми растау бар ма?
Қазіргі сәтте Киев те, Мәскеу де Запорожье облысындағы нақты өзгерістер жөнінде толық ресми мәлімет жариялаған жоқ. Майдандағы ақпараттың едәуір бөлігі тәуелсіз расталмаған арналар мен әскери шолушыларға сүйенеді, сондықтан деректер өзгеріп отыруы мүмкін.
