Жазылу
Украинада «рашизм» термині ресми түрде заңда бекітілді
Украина президенті Владимир Зеленский 29 тамыз күні «Украин халқының ұлттық жадын мемлекеттік саясаттың негіздері туралы» заңға қол қойды. Құжатта алғаш рет «рашизм» ұғымы ресми түрде анықталып, мемлекет деңгейінде заңдастырылды.
Бұл заң Украинада тарихи жадты сақтау мен қорғау саясатының негізгі принциптерін бекітеді және оны ұлттық қауіпсіздіктің құрамдас бөлігі ретінде қарастырады. Құжатта «Украинаның тәуелсіздігі үшін соғыс», «тарихи антиукраиндық насихат», «украин халқына қарсы қылмыстар» сияқты ұғымдар да алғаш рет мемлекеттік деңгейде белгіленген.
Президент кеңсесі басшысының орынбасары Ирина Верещук бұл заңды «ұлттық бірегейлікті қорғау мен дамытуға арналған іргелі құжат» деп атап, алдыңғы президенттердің мұндай батыл қадамға бармағанын айтты. Заңды Жоғарғы рада 21 тамызда мақұлдаған еді.
«Рашизм» анықтамасыҚұжатта «рашизм» ұғымы былай сипатталған:
«Агрессор мемлекеттегі ресейлік нацистік тоталитарлық режимнің негізінде жатқан, орыс шовинизмі мен империализм дәстүрлеріне сүйенген, коммунистік және ұлттық-социалистік (нацистік) тоталитарлық режимдердің тәжірибелерін қамтитын тоталитарлық идеология мен тәжірибенің түрі».
2023 жылдың мамыр айында Жоғарғы рада Ресей билігінің «рашизм» идеологиясын пайдалануын айыптап, арнайы мәлімдеме қабылдаған болатын. Онда украин парламенті БҰҰ-ға, Еуропарламентке, НАТО парламенттік ассамблеяларына, сондай-ақ өзге елдердің үкіметтері мен парламенттеріне «рашизм» идеологиясы мен саясатын айыптауға шақырған еді.
Осылайша, Украинада «рашизм» термині ресми саяси-құқықтық деңгейде бекітіліп, елдің ұлттық жад және қауіпсіздік саясатының бір бөлігіне айналды.
