Жазылу
Украинадағы соғыста қанша қазақстандық көз жұмғаны белгілі болды
Украинадағы «Хочу жить» жобасы Ресей армиясының қатарында соғысып жүріп қаза тапқан Қазақстан азаматтарының есімдерін жариялады.
Тізімде кемінде 270 адам бар. Жобаның мәліметінше, нақты саны бұдан әлдеқайда көп болуы мүмкін — кейбірі із-түссіз кеткен, кейбірінің аты-жөні анықталмаған.
Ең жасы — 19, ең үлкені — 64 жаста
Қаза тапқандардың ең жасы — 2005 жылы туған Андрей Богомолов, небәрі 19 жаста болған.
Ең егдесі — 254-мотоатқыштар полкының сарбазы, 64 жастағы Александр Ялфимов.
Тізімге жалдамалы әскерлер де, Ресей мен Қазақстан аумағында жергілікті деңгейде жалдау арқылы соғысқа тартылғандар да кіреді.
Қалай жалдайды?
Жобаның авторларының айтуынша, қазақстандықтарды жалдау процесі әлі де жалғасып жатыр.
«Адамдарды түрмелерде, еңбек мигранттарының арасынан, сондай-ақ “Ресейде жоғары жалақылы жұмыс ұсынамыз” деп жарнама беретін жалған агенттіктер арқылы іздейді. Интернеттегі жарнамалар ТМД елдерінің азаматтарына арнайы бағытталған,» — дейді зерттеу тобы.
Сарапшылар Ресейдің соңғы уақытта алыс шетелден емес, тілі мен мәдениеті жақын көрші мемлекеттерден әскер жинауға басымдық беріп отырғанын айтады.
Заң не дейді?
Қазақстан заңнамасына сәйкес, шетелдегі соғысқа қатысқандарға бас бостандығынан айыру жазасы қарастырылған. Қылмыстық кодекстің 172-бабы — «Шетелдік қарулы қақтығыстарға қатысу» — бойынша 5 жылдан өмір бойына дейін бас бостандығынан айыру және азаматтықтан айыру жазасы қолданылуы мүмкін.
