Украинадағы соғыста Ресейдің 220 мыңға жуық жауынгері қаза тапқан – БАҚ

Бұл туралы «Медуза» және «Медиазона» басылымдары хабарлады. 

Журналистер мұндай қорытындыға мұрагерлік істердің мемлекеттік реестрін және еріктілер мен БАҚ жүргізіп отырған қаза тапқандардың тізімін талдау арқылы келген.

Жыл сайын өскен шығын

Зерттеу нәтижесінде Ресей армиясындағы шығындар жылдан жылға күрт артқаны анықталды.

• 2023 жылы майданда шамамен 50 мың ресейлік әскери қаза тапқан;

• 2024 жылы бұл көрсеткіш 93 мыңға жеткен.

2024 жылдың қараша айында ресейлік әскер арасындағы өлім-жітім апатты деңгейге жетіп, бір апта ішінде 3 мыңға жуық адам қаза болған. «Медиазона» мұны 2024 жылдың екінші жартысынан бастап Ресей соттарына әскери қызметкерлерді қаза тапқан немесе хабар-ошарсыз кеткен деп тану туралы істердің жаппай түсе бастағанымен түсіндіреді.

ВВС-дің Орыс қызметі, «Медиазона» және еріктілер ашық дереккөздерден жинақтап жүрген тізімге сәйкес, 2025 жылдың тамыз айының соңына қарай 125 681 адамның қазасы тіркелген. Алайда бұл толық сан емес, өйткені әрбір өлім-жітім туралы жария түрде хабарланбайды.

Ресей билігі Украинадағы соғыста қаза тапқан немесе жараланғандар саны жөнінде ресми дерек таратпай отыр.

Батыс барлау деректері

Батыс ақпарат құралдары барлау деректеріне сүйене отырып, Ресейдің жалпы шығыны жүздеген мың адамды құрайды деп жазды. Қаза тапқандар мен жараланғандарды қоса есептегенде, Ресей мен Украинадағы жалпы шығын саны 1 миллионға дейін жетуі мүмкін деген болжам бар. Оның ішінде Ресейдің шығыны әлдеқайда жоғары деп бағалануда.