ҰҚШҰ Тасмағамбетовтің орнына жаңа бас хатшы сайлауға дайындалып жатыр

Иманғали Тасмағамбетовтің өкілеттік мерзімі аяқталып келеді, ал оның орнына келетін жаңа басшыны 27 қараша күні Бішкекте өтетін бірлескен отырыста сайлайды. Жиынға сыртқы істер министрлері, қорғаныс министрлері және қауіпсіздік кеңестерінің хатшылары қатысады.

Ұйым таратқан анонста айтылғандай, жиында мүше мемлекеттер:

• есірткі таратуға қарсы күресті,

• заңсыз миграция мәселесін,

• аймақтық қауіпсіздік пен ортақ ұстанымдарды

талқылайды. Сонымен қатар ҰҚШҰ Қауіпсіздік кеңесі декларация қабылдап, 2026 жылы Ресейдің төрағалығы кезеңінде жүзеге асырылатын басым бағыттарды жариялайды.

Иманғали Тасмағамбетов мемлекеттік қызметте түрлі жоғары лауазымдарда жұмыс істеген. Ол бұған дейін – Қазақстан премьер-министрі, Астана және Алматы қалаларының әкімі, Қорғаныс министрі, Ресейдегі Қазақстанның елшісі қызметтерін атқарды.

ҰҚШҰ бас хатшысы қызметіне тағайындалуы оның халықаралық деңгейдегі мансабының жаңа сатысы ретінде бағаланған болатын. Алайда бұл қадам талқысыз өткен жоқ.

Украина мәселесіне қатысты мәлімдемесі дау тудырды

Биыл көктемде Тасмағамбетов ресейлік БАҚ-қа берген сұхбатындағы соғысқа қатысты мәлімдемесі  сынға себеп болды.

Кейін ол түсініктеме беріп, ешқандай «өзге елдің мүддесін қолдамайтынын» және Қазақстанды халықаралық жанжалдарға тарту ниеті жоқ екенін айтты. Бірақ бастапқы мәлімдеме қоғамда да, сарапшылар арасында да резонанс туғызды.

«Миротворец» тізіміне енгізілуі

Жақында Иманғали Тасмағамбетовті Украинаның «Миротворец» дерекқорына қосты. Оны соғыс насихаты, Ресейдің Украинаға қарсы агрессиясын қолдау сияқты айыптаулармен тізімге енгізген.

Бұл жағдай оның халықаралық имиджіне тағы бір көлеңке түсірді.

27 қарашадағы отырыста жаңа бас хатшының кім болатыны белгілі болады. Сарапшылардың пікірінше, Ресейдің ықпалы жоғары ұйым үшін басшылықтың ауысуы аймақтық саясатқа әсер етуі мүмкін.