Ұлттық бірыңғай тестілеу аяқталды

ҰБТ электронды форматта 43 тестілеу орталығында өтті. Су апатынан зардап шеккен 6 өңірде, атап айтқанда, Ақмола, Ақтөбе, Атырау, Батыс Қазақстан, Қостанай, Солтүстік Қазақстан облыстарында ҰБТ 12 шілдеге дейін ұзартылған болатын. 

«ҰБТ-ның маңызды артықшылықтарының бірі оны тапсыруға екі мүмкіндік беріліп, тестіленуші ең жақсы нәтижені грант иелену үшін конкурсқа жолдай алады», - деді Ғылым және жоғары білім министрлігінің өкілі Гүлзат Көбенова.

Спикердің айтуынша, соңғы үш жылдың ішінде алғаш рет 140 балл жинаған талапкер шықты. Ал, 716 оқуға түсуші 130 балдан жоғары нәтижеге қол жеткізген.

Биыл мектеп түлектерінің саны артып, 181 мыңнан астам талапкер екі мүмкіндікті қоса есептегенде 326 мың рет тапсырды. 

Алдын ала ақпарат бойынша, 139 мыңға жуық талапкер шекті балл жинады. Олар грант конкурсына қатыса алады.