Үндістанда 14 бала жөтел шәрбатын ішіп қайтыс болды

Үндістан полициясы құрамында диэтиленгликоль деген өлімге әкелетін токсин бар Coldrif жөтел сиропын ішкен кем дегенде 14 баланың өліміне қатысты тергеуді бастады. Бұл туралы Reuters хабарлады.

Шенеуніктердің айтуынша, қаза тапқандардың көпшілігі бес жасқа толмағандар және қыркүйек айында бүйрек жетіспеушілігінен қайтыс болған. Сынақтар препараттың құрамындағы диэтиленгликоль мөлшері рұқсат етілген шектен 500 есе асып кеткенін көрсетті. Токсин антифризде, косметикада және майлау материалдарында қолданылады және ішке түскен кезде құсу, ауырсыну және өлімге әкелетін бүйректің жедел зақымдалуын тудырады.

Сироп өндірушісі, Sresan Pharma тергеудің назарына айналды. Полицейлер балаларға дәрі жазып бергені анықталған дәрігерді ұстады. Үндістанның федералды үкіметі компанияның лицензиясын қайтарып алуды ұсынып жатқанын айтты және бірнеше штат Coldrif дәрісін сатуға тыйым салған.

Екі штатта сыналған үлгілерде ДДҰ мен Үндістанның реттеушілері рұқсат еткен 0,1 пайызбен салыстырғанда 46-48 пайыз диэтиленгликоль болды.

Осыған ұқсас зат бұған дейін Гамбия, Өзбекстан, Камерун және Үндістанның өзінде соңғы жылдары 150-ден астам баланы өлтірген үнді сироптарынан табылған. Қайғылы оқиғалар елдің әлемдегі ең ірі дәрі өндірушілердің бірі ретіндегі беделіне айтарлықтай нұқсан келтірді.

Прокуратураның хабарлауынша, Sresan Pharma және оның шенеуніктері еріксіз кісі өлтірді, дәрі-дәрмектің қолдан жасалуы және «Дәрілік заттар мен косметика туралы» заңды бұзды деген күдікке ілінген. Егер кінәсі дәлелденсе, олар өмір бойына бас бостандығынан айырылуы мүмкін.

Үндістанның фармацевтикалық өнеркәсібі 50 миллиард долларды құрайды және көлемі жағынан АҚШ пен Қытайдан кейін екінші орында тұр. Алайда, Coldrif трагедиясы қатаң экспорттық ережелер қолданылмайтын ішкі нарықтағы дәрілердің сапасы мен қауіпсіздігіне тағы да күмән келтірді, деп жазады басылым.

Айта кетейік, бұған дейін Үндістанда шығарылатын осындай жөтел шәрбаттан әлем бойынша 141 бала қаза тапқан.