Үндістандағы ірі мұнай компаниясы Ресей мұнайын қайта сатып ала бастады

 Бұл туралы Bloomberg агенттігі дереккөздерге сілтеме жасап хабарлады.

Агенттік мәліметінше, Reliance Industries Ресей мұнайын санкция тізіміне енбеген делдалдар арқылы төмендетілген бағамен сатып алып отыр. Алынған шикізат Үндістанның Гуджарат штатындағы компанияға тиесілі мұнай өңдеу зауытына жеткізіледі. Кәсіпорынның тәуліктік қуаты – 660 мың баррель, ол елдің ішкі нарығын жанармай өнімдерімен қамтамасыз етеді.

Ресей мұнайын тасымалдау үшін Reliance Industries «РусЭкспорт» компаниясымен Aframax санатындағы танкерлерді пайдалану жөнінде келісім жасаған. Bloomberg дереккөздерінің айтуынша, дәл осы схема Үндістанның Ресейден мұнай импортын күрт қысқартудан сақтап қалуы мүмкін. Бұған дейін ресми тұлғалар желтоқсан айында импорт көлемі екі еседен астам азаюы ықтимал екенін мәлімдеген еді.

АҚШ санкциялары және Үндістанның таңдауы

АҚШ билігі 22 қазанда Ресейге қарсы жаңа санкциялар пакетін енгізген. Бұл шешім Мәскеудің Украинадағы соғысты тоқтатуға ниет танытпауы себепті қабылданғаны айтылды. Санкциялық тізімге Ресейдің ірі мұнай компаниялары – Роснефть пен Лукойл, сондай-ақ олардың Ресей аумағындағы еншілес құрылымдары енгізілді. Санкция талаптарын бұзғандарға АҚШ азаматтарына да, шетелдіктерге де азаматтық немесе қылмыстық жауапкершілік қарастырылған.

Бұған дейін, қазан айында Reuters агенттігі Reliance Industries компаниясының санкция қаупіне байланысты Ресей мұнайын сатып алуды қысқарту немесе толық тоқтату мүмкіндігін қарастырып жатқанын хабарлаған болатын. Алайда соңғы мәліметтер Үндістанның ірі энергетикалық ойыншысы арзан ресейлік мұнайдан толықтай бас тартуға дайын емес екенін көрсетіп отыр.

Сарапшылардың пікірінше, бұл жағдай Үндістанның энергетикалық қауіпсіздік пен геосаяси қысым арасындағы тепе-теңдікті сақтауға тырысып отырғанын аңғартады. Ресей мұнайы Үндістан үшін әлі де экономикалық тұрғыдан тиімді ресурс болып қала бермек.