Вэнс: Украина бәрібір Донбасстан айырылатынын түсініп отыр

Оның сөзінше, украиналық келіссөз жүргізушілер бейресми әңгімелерде Донецк облысын қандай да бір деңгейде бақылаудан айыруы мүмкін екенін түсініп отыр.

Вэнс Украина тарапы Ресей Федерациясының Донецк облысын толық бақылауға алуы мүмкін деген сценарийді ұлттық қауіпсіздік тұрғысынан аса күрделі мәселе деп қабылдайтынын атап өтті.

«Алайда жеке сұхбаттарда олар түптің-түбінде бұл өңірден айырылып қалуы ықтимал екенін мойындайды. Бірақ бұл бір жылдан кейін немесе одан да кеш болуы мүмкін», – деді АҚШ вице-президенті.

Сонымен қатар Вэнс Ресейдің Донбасс аумағын толық басып алуы үшін кемінде бір жыл немесе одан да ұзақ уақыт қажет болатынын айтты. Оның пікірінше, Донбасстың кімге тиесілі болатыны мәселесі бейбіт келіссөздер жолындағы ең үлкен кедергілердің бірі болып отыр.

Дегенмен АҚШ вице-президенті келіссөздерде белгілі бір ілгерілеу бар екенін де атап өтті. Оның айтуынша, ең басты жетістік – бүгінде барлық негізгі мәселелер ашық талқыланып жатыр, тараптар қандай тақырыптардың келіссөздер аясында қаралатынын және қайсысы қаралмайтынын нақты түсіне бастаған.

Соған қарамастан, Вэнс келіссөздердің табысты аяқталатынына толық сенімді емес екенін жеткізді.

«Менің ойымша, біз бейбіт келісімге келуіміз де мүмкін, сондай-ақ оған қол жеткізе алмауымыз да әбден ықтимал», – деді ол.

Өткен демалыс күндері келіссөздер АҚШ-тың Майами қаласында жалғасты. Онда Кирилл Дмитриев бастаған Ресей делегациясы болды. АҚШ президентінің арнайы өкілі Стив Уиткофф екі күнге созылған кездесулерді «тиімді әрі конструктивті» деп бағалады. Алайда келіссөздердің нақты мазмұны жарияланған жоқ.