"Веймар+": Ресей Украинадағы атысты тоқтату мәселесін дереу бастауы тиіс

Бұл туралы Лондонда "кеңейтілген Веймар үштігі" ("Веймар+") форматында өткен кездесудің қатысушылары мәлімдеді. Аталмыш формат Германия, Франция және Польшаны Ұлыбритания, Италия және Испаниямен, сондай-ақ ЕО-ның сыртқы істер және қауіпсіздік саясаты жөніндегі жоғары өкілі Кая Калласпен біріктіреді.

"Қазіргі уақытта Ресей прогреске ұмтылудың нақты ниетін көрсетіп отырған жоқ. Ол мұны кідіріссіз жасауы керек", – деді олар.

Қатысушы елдердің сыртқы істер министрлерінің айтуынша, атысты дереу және сөзсіз 30 күнге тоқтату – "әділ, толыққанды және тұрақты бейбітшілік туралы келіссөздер үшін мүмкіндік ашар еді", деп хабарлады AFP агенттігі.

Германия атынан бұл кездесуге Йоханн Вадефуль (Johann Wadephul) қатысты. Украина тарапынан келіссөздерге сыртқы істер министрі Андрей Сибига қатысты. Германия үкіметі 2025 жылы Украинаға көрсетілетін көмекті 3 миллиард еуроға арттыратынын мәлімдеді. Бұл қаражат 40 миллион еуро көлеміндегі гуманитарлық көмекке қосымша ретінде бөлінеді.

Кездесу барысында қатысушылар Еуропалық Комиссияның Еуропа қорғанысын нығайтуға бағытталған негізгі жобаларын да талқылады. Олардың қатарында "Еуропа үшін қауіпсіздік және іс-қимылдар" (SAFE) механизмі мен "Еуропалық қорғаныс өнеркәсібі бағдарламасы" (EDIP) бар.

Егер 12 мамыр күнінің соңына дейін Ресей атысты тоқтатпаса, жаңа санкцияларды енгізуге дайындық "іске қосылады", — деп бұрын Германия үкіметінің өкілі Штефан Корнелиус (Stefan Kornelius) мәлімдеген еді. Оның айтуынша, мұндай жағдайда мемлекет және үкімет басшыларының саяси кеңесшілері деңгейінде консультациялар басталады.

Бұған дейін Ресей президенті Владимир Путин Украинамен тікелей келіссөздерді 15 мамыр күні Түркияда "алдын ала шарттарсыз" өткізуді ұсынған еді. Алайда ол Еуропа елдері мен АҚШ-тың Мәскеуге 30 күндік бітім жариялау жөніндегі үндеуін елемей қойды.

Еске салайық, Украина президенті Владимир Зеленский бұл ұсынысқа жауап беріп, Путинмен Стамбулда тікелей келіссөз өткізуге дайын екенін мәлімдеді. "Мен бейсенбі күні Түркияда Путинді күтемін. Жеке. Бұл жолы Ресей тарапы келіссөзден бас тартуға себеп іздемейді деп үміттенемін", – деп жазды Зеленский.