Владимир Зеленский Вашингтонға барды

Президент Зеленский Вашингтонда алдымен АҚШ-тың жетекші қорғаныс компанияларының өкілдерімен жүздесуді жоспарлап отыр. Кездесулердің басты тақырыбы Украинаға қосымша әуе шабуылына қарсы қорғаныс жүйелері мен әскери техника жеткізу мәселелері болмақ. Бұдан бөлек, Зеленский энергетика саласындағы америкалық компаниялармен де келіссөздер өткізеді деп күтілуде.

Ақ үйдің ресми кестесіне сәйкес, Зеленский сағат 13:00-де (Астана уақытымен 22:00-де) Ақ үйге барады. Бұл кездесу жабық есік жағдайындағы жұмыс түскі ас форматында болады. Келіссөздер барысында екі ел арасындағы қауіпсіздік саласындағы әріптестік, экономикалық байланыстар және Украинадағы қазіргі ахуал талқылануы мүмкін.

Айта кетейік, 16 қазан күні кешке АҚШ Президенті Дональд Трамп Ресей Президенті Владимир Путинмен телефон арқылы сөйлесті. Әңгіме барысында тараптар Украинадағы жағдай мен АҚШ-тың Украинаға "Томагавк" зымырандарын беру мүмкіндігін талқылады.

Ресей Президентінің көмекшісі Юрий Ушаковтың айтуынша, Путин АҚШ-тың Украинаға алыс қашықтықтағы зымырандарды беруі майдандағы жағдайды өзгертпейтінін, бірақ Ресей мен АҚШ арасындағы қатынастарды күрделендіретінін атап өтті.

Кездесу соңында Трамп пен Путин жеке кездесу өткізуге келісті. Ол Будапешт қаласында өтеді деп жоспарланып отыр.

Зеленскийдің бұл сапары Украина мен АҚШ арасындағы стратегиялық әріптестікті нығайтуға бағытталған маңызды қадам болып саналады. Қорғаныс, энергетика және қауіпсіздік мәселелері осы сапардың негізгі назарындағы тақырыптар. Ал алдағы келіссөздердің нәтижесі аймақтық тұрақтылық пен халықаралық қатынастарға әсер етуі ықтимал.