Юлия Навальная "Навальный" атындағы саяси сыйлық тағайындалатынын мәлімдеді

Юлия Навальная күйеуі әрі саясаткер Алексей Навальныйдың қайтыс болғанына бір жыл толуына орай оның атына жыл сайынғы сыйлық тағайындалатынын жариялады. Берлиндегі Кайзер Вильгельм мемориалдық шіркеуінде Навальныйдың жесірі: «Бұл жас саясаткерлерге, бұқаралық бастамаларға берілген марапат болады», - деді.

Саясаткерді еске алуға 500-ге жуық адам жиналды, деп хабарлайды DW тілшісі.

2024 жылдың тамызында Ресей мен Батыс арасындағы ауқымды тұтқын алмасу аясында ресейлік түрмелерден босатылған саясаткерлер Илья Яшин мен Андрей Пивоваров шіркеуде кезекте тұрды.

Еске алу кешінде сөз сөйлеген Юлия Навальная өзінің саяси миссиясын "Владимир Путин режимінің мүмкіндігінше тезірек жойылуын" қамтамасыз ету деп санайтынын айтты.

"Мен қайтып оралуды армандаймын", - деді ол.

Бұған дейін Берлиндегі Ресей елшілігінің алдында ондаған адам соғысқа қарсы шеру өткізген болатын.

Навальныйды еске алуға арналған іс-шаралар дүние жүзінде өтті

Ресейдің және басқа елдердің  қалаларында ресейлік оппозиция қайраткерін еске алуға арналған шаралар өтті. Навальный командасы ұйымдастырған шетелдегі еске алу кеші 44 елдің 146 қаласында өтті.

Мәскеудегі Навальныйдың бейітіне кезек 400 метрден астамға созылды, деп хабарлайды агенттік тілшісі.

Германия канцлері Олаф Шольц 16 ақпанда оппозиция жетекшісінің бір жыл бұрын «Ресейдегі демократия мен еркіндікті қорғағаны үшін» қаза болғанын айтты. Германия үкіметі жетекшісінің айтуынша, Ресей президенті «бостандық пен оны қорғаушыларға қарсы аяусыз күресіп жатыр», бірақ Навальныйдың батылдығы жағдайды өзгертті және ол қаза болғаннан кейін де өз әсерін тигізіп жатыр.