Жазылу
Запорожье қаласына жасалған Ресей шабуылынан кемінде бес адам қаза тапты
Ресей 20 қараша күні кешке Украинадағы Запорожье қаласына шабуыл жасады. Шабуыл салдарынан қаза тапқандар мен жараланғандар бар. Тұрғын үйлер, дүкендер мен базар зардап шекті.
Украина Төтенше жағдайлар қызметінің мәліметінше, соңғы ақпаратқа сай, шабуыл нәтижесінде кемінде бес адам қаза тауып, тағы үш адам жарақат алған.
Запорожье облыстық әскери әкімшілігінің басшысы Иван Федоровтың айтуынша, соққыдан бірнеше үй, дүкен және базар айтарлықтай бүлінген. Жапа шеккендер саны әлі нақтыланып жатыр. Оқиға орнында құтқару қызметтері жұмыс істеуде.
Бұған дейін Федоров облыс аумағына бағытталған басқарылатын авиабомбалармен шабуыл қаупі бар екенін ескерткен.
Бір күн бұрын Ресей әуе күштері Харьков, Львов, Тернополь және өзге де бірқатар украин қалаларына шабуыл жасаған еді.
Президент Владимир Зеленскийдің айтуынша, бір тәуліктің ішінде Украина аумағына 470-тен астам соққы беретін дрон және 48 зымыран жіберілген.
Украина ұлттық полициясының мәліметінше:
Тернопольде 26 адам, оның ішінде үш бала қаза тапқан;
93 адам, оның ішінде 18 бала жараланған.
Украин қалаларына жасалған соңғы шабуылдар соғыстың жаңа толқынының қаншалықты қауіпті екенін тағы бір мәрте көрсетті.
