Зеленский: Иранға байланысты АҚШ Киевке қысымды күшейтіп жатыр

Оның айтуынша, Вашингтон Киевке қысымды күшейтіп, Донбастан әскерді толық шығаруды талап етіп отыр.

Зеленский Reuters агенттігіне берген сұхбатында АҚШ Украинаға қауіпсіздік кепілдіктерін тек бір шартпен беруге дайын екенін айтты – ол үшін Киев Ресейге ауқымды аумақтарды, соның ішінде бүкіл Донбасты беруге келісуі тиіс.

— Америкалықтар Украина Донбастан әскерін шығаруға дайын болған жағдайда ғана жоғары деңгейдегі қауіпсіздік кепілдіктерін ұсынуға әзір, - деді ол.

Президенттің айтуынша, Трамп соғысты мүмкіндігінше тез аяқтауға тырысып отыр. Бұл, Зеленскийдің пікірінше, Иран төңірегіндегі жағдаймен тікелей байланысты.

— Таяу Шығыс Трамптың шешімдеріне анық әсер етіп отыр, - деді Украина басшысы.

Зеленский Донбастан толық шегіну Украина мен Еуропа қауіпсіздігіне қауіп төндіретінін ескертті. Оның сөзінше, бұл аймақта мықты қорғаныс шептері бар, ал олар Ресейдің бақылауына өтсе, жағдай күрделене түседі.

Келіссөздер мен күмән

Бұған дейін Зеленский АҚШ-пен қауіпсіздік кепілдіктері туралы келісім толық дайын екенін айтқан еді. Алайда 24 наурызда Майамиде өткен келіссөздерден кейін бұл құжат әлі де пысықтауды қажет ететіні белгілі болды.

Зеленский бұған дейін де Вашингтон Украинадағы соғысты жазға дейін аяқтауды талап еткенін мәлімдеген. Оның айтуынша, АҚШ-тың бұл ұстанымы ішкі саяси процестермен байланысты.

— Америкалықтар соғысты осы жазға дейін аяқтауды ұсынып отыр. Себебі олардың өз ішіндегі саяси мәселелер күшейеді, - деген еді ол.

Айта кетейік, АҚШ-та сайлауалды кезеңнің басталуы жаз айларына сәйкес келеді. Соған байланысты Вашингтонның сыртқы саясаттағы басымдықтары өзгеруі мүмкін.