Зеленский: Украина мен Ресей арасындағы жаңа келіссөздер АҚШ-та өтеді

 Бұл туралы ол сенбі, 7 ақпанда, журналистермен өткен кездесуде айтты.

Зеленскийдің сөзінше, Вашингтон Киев пен Мәскеудің келіссөз жүргізуші делегацияларына алдағы аптада Майами қаласында бас қосуды ұсынған. Украина бұл кездесуге қатысатынын ресми түрде растаған. Ал мақала жарияланған сәтке дейін Ресей тарапы бұл мәселеге қатысты пікір білдірмеді.

Украина президентінің айтуынша, АҚШ соғыстың алдағы бірнеше ай ішінде, тіпті маусым айына дейін аяқталғанын қалайды.

«Олар бәрін маусымға дейін шешкісі келетінін айтып отыр», – дейді Зеленский.

Сонымен бірге, Зеленский Украина Вашингтон мен Мәскеу арасында ғана жасалған, Киевтің қатысуынсыз қабылданған ешқандай келісімді мойындамайтынын қатаң атап өтті.

БАӘ-дегі келіссөздерден кейін шешілмеген мәселелер қалды

Украина, Ресей және АҚШ арасындағы алдыңғы келіссөздер 4-5 ақпанда Біріккен Араб Әмірліктерінде жабық форматта өткен. Киев бұл кездесуді күрделі болғанымен, конструктивті деп бағалаған. Ал ТАСС агенттігінің мәліметінше, ресейлік қатысушылар Украинамен бейбіт келісімге қатысты белгілі бір ілгерілеу бар екенін мәлімдеген.

АҚШ мемлекеттік хатшысы Марко Рубио болса, шешілмеген мәселелер тізімі «айтарлықтай қысқарғанын», алайда «ең күрделі түйіндер әлі де қалғанын» айтты. Атап айтқанда, Ресей әскері басып алған украиналық аумақтардың болашағы әлі нақты айқындалмаған.

Соған қарамастан, Ресей Украинаға қарсы әскери шабуылдарын жалғастырып жатыр.