Зеленский: Украинаның ядролық қарудан бас тартуы қателік болды

Зеленскийдің сөзінше, 1994 жылғы Будапешт меморандумы аясында Украина АҚШ, Ұлыбритания, Франция, Қытай және Ресейден қауіпсіздік кепілдіктерін алып, ядролық арсеналынан бас тартқан.

 «Украина ядролық қарудан бас тартуға келіскен кезде, оған төленетін “баға” әділ болуы керек еді. Менің ойымша, НАТО-ға мүшелік – сол кезде алынуы тиіс ең аз кепілдіктің өзі еді. Ал біз не алдық? Ештеңе. Бұл әділетсіз ойын және үлкен қателік болды», – деді Зеленский.

Оның айтуынша, меморандумға қол қойған елдер Украинаға қауіпсіздікті қамтамасыз етуі тиіс еді. Алайда іс жүзінде бұл міндет орындалмаған.

Зеленский сондай-ақ Украинаның ядролық қаруының едәуір бөлігі Ресейге берілгенін атап өтті. Оның ішінде стратегиялық авиация да болған, ал бұл техника қазір Украинаға қарсы соғыста қолданылып жатыр.

Айта кетейік, Зеленский бұған дейін де бұл мәселені бірнеше рет көтерген. 2025 жылдың қаңтарында италиялық Il Foglio басылымына берген сұхбатында ол ядролық қарудан бас тартуды «ақылсыз әрі жауапсыз шешім» деп бағалаған.

Ал 2025 жылдың ақпанында британдық журналист Морганға берген сұхбатында Украина қауіпсіздігінің бір кепілі ретінде Батыс елдері тарапынан ядролық қару берілуі мүмкін екенін айтқан. Оның пікірінше, мұндай қадам Ресей президенті Путинді  жаңа шабуылдан тежей алар еді, тіпті Украина НАТО-ға қабылданбаса да.