Зеленский Вашингтонда «дипломатиялық жеңіске» қол жеткізді – The Telegraph

 Бұл туралы The Telegraph газеті жазды.

Басылым атап өткендей, Зеленский бұл жолы Вашингтонға дұрыс дайындықпен келген. Ақпан айында Ақ үйдегі алғашқы кездесу кезінде оның әскери стилдегі киімі америкалық қоғамда сын тудырған еді. Бірақ бұл жолы Украина басшысы қара костюм киіп, байсалды бейнесін сақтады. Журналистердің бірі оны киіміне байланысты мақтағанда, Зеленский мысқылмен: «Мен өзгердім, сіз өзгермепсіз», – деп жауап беріп, залды күлдірген.

Трампқа құрмет пен психологиялық қадамдар

The Telegraph-тың жазуынша, Зеленский мен еуропалық көшбасшылардың тактикасы анық байқалды: олар Трампқа қажетті деңгейде құрмет көрсете отырып, қарсыластарына қысым түсіретін позиция ұстанды.

Сонымен қатар, ерекше бір қадам – Зеленскийдің жұбайы жазған хатты АҚШ-тың бірінші ханымына жеткізу болды. Бұл қадам Мелания Трамптың бұған дейін Владимир Путинге жолдаған «балаларды қорғау» туралы хатына ишара ретінде бағаланды. Басылым мұны «жоспар бойынша да, сахналастыру бойынша да мінсіз шешім» деп атады. Психологиялық тұрғыдан бұл қадам Трампты Киев жағына тартуға арналған айла болды.

Еуропаның кішігірім, бірақ маңызды жетістігі

Жалпы көрініс Украина үшін толық жеңіс болмаса да, Аляскадағы саммитпен салыстырғанда еуропалық альянс айтарлықтай стратегиялық табысқа қол жеткізді. Ең бастысы – Трамп бұл жолы Украинаны қолдауда шын ниетті екенін көрсетіп, АҚШ әскерін енгізу мүмкіндігін жоққа шығарудан бас тартты. «Олар (Еуропа) – бірінші қорғаныс шебі. Бірақ біз де көмектесеміз, біз қатысамыз», – деді ол.

Сонымен бірге, Трамп Зеленский мен Путин арасындағы кездесуге дайындық басталғанын мәлімдеді. Бұл Киев пен оның одақтастары үшін тағы бір дипломатиялық жеңіс ретінде қабылданды. Себебі мұндай кездесу Ресей президентінің Зеленскийді заңды мемлекет басшысы ретінде мойындауын білдіреді.

Путин қысым астында

The Telegraph-тың бағалауынша, дүйсенбі күнін Украина «дипломатиялық жеңіс күні» ретінде белгілей алады. Кейінгі апталарда алғаш рет Владимир Путин қысымға түскендей болды. Егер ол мұндай жағдайға жауап ретінде келіссөздерді бұзса немесе бітімнен бас тартса, халықаралық қауымдастық алдында өзін кінәлі жақ ретінде көрсетіп алуы ықтимал. Бұл жағдайда Ақ үйдің нақты жауап шараларына тап болуы ғажап емес.