Лукашенко Зеленскиймен соғысты аяқтау туралы сөйлесуге дайын екенін мәлімдеді

 Бұл туралы ол «Россия 1» телеарнасының тілшісі Павел Зарубинге берген сұхбатында мәлімдеді. Әңгіме оның Кремльде Ресей президенті Владимир Путинмен кездескеннен кейін өрбіген. Зарубин сұхбаттың үзінділерін 26 қыркүйек күні Telegram-арнасында жариялады.

«Менің оған (Зеленскийге) айтарым бар. Бізге кеңеске кірісетін уақыт жетті. Арнайы операция басталғанда айттым – үш славян мемлекетінің басшылары отырып, осы түсініксіз соғысты тоқтатуымыз керек. Келісімге келуіміз қажет. Егер келісе алмасақ – барлығына қиын болады», – деп атап өтті ол.

Лукашенконың сөзінше, Украина мәселесіне қатысты «үстелде жақсы ұсыныс бар». Ол ұсыныс Аляскада АҚШ президенті Дональд Трампқа жеткізіліп, Вашингтонға әкетілген.

 «Өте жақсы ұсыныс», – деді Лукашенко, бұл Зеленский үшін тиімді шарттар екенін және оларды америкалықтар жалпы алғанда мақұлдағанын айтты. Алайда Вашингтон әзірге бұл ақпаратты ресми түсіндірген жоқ.

Лукашенконың айтуынша, 2022 жылы соғысты тоқтатып, бейбіт келісімге келу керек еді.

«Сол кезде бүкіл шығыс Украинаға тиесілі болар еді – Қырымнан басқа. Бірақ тоқтамады, шығысты жоғалтты. Егер қазір де тоқтамаса, меніңше, бүкіл Украинаны жоғалтады», – деді Беларусь басшысы.

Қорытындылай келе, Лукашенко Зеленскиймен диалогқа дайын екенін айтып, «жақсы ұсыныстың» барын жеткізді. Бірақ оның нақты мазмұны әзірге белгісіз.