Жазылу
Жамбыл облысында балаларға қорлық көрсету ісі бойынша тергеу аяқталды
Жамбыл облысында қоғамда үлкен резонанс тудырған қылмыстық істің тергеуі аяқталды. Бұл іс екі баланың бірнеше жыл бойы өгей әкесінен зорлық-зомбылық көргені туралы жағдайға қатысты. Мұндай деректі алғаш рет балалар омбудсмені Динара Закиева жариялаған еді.
Бұл оқиға туралы хабарлама 8 тамызда тарады. Алғашында «балалар құлдықта болған» деген ақпарат шыққанымен, омбудсмен кейінірек олардың нақты құлдықта болмағанын, бірақ үнемі соққыға жығылып, психологиялық қысым көргенін нақтылады.
Сол күні-ақ күдікті полицейлер тарапынан ұсталды. Ал зардап шеккен балалар Тараздағы балаларды қолдау орталығына орналастырылды. Жағдай қоғамда кең талқыға түсіп, ішкі істер министрінің жеке бақылауына алынған.
Ішкі істер министрлігінің 28 тамыздағы ресми хабарламасында:
– Талас ауданы тұрғынына қатысты екі кәмелетке толмағанды жүйелі түрде ұрып-соғу фактісі бойынша қозғалған қылмыстық іс аяқталды. Айыптау актісімен іс прокуратураға жолданып, сот қарауына жіберілмек, – делінген.
Әлеуметтік желілерде балалардың анасының сұхбаты тарап, онда ол күйеуін қорғап, тағылған айыптарды жоққа шығарған. Дегенмен тергеу органдары отбасында жүйелі түрде зорлық-зомбылық болғанын растайтын нақты дәлелдердің бар екенін хабарлады.
