Алтын адам жазуының құпиясын ашқан ғалым

Сайт әкімшілігі

22.10.2020, 04:36

3219

Биыл Есік қорғанынан табылған Алтын адам жазуларын 30 жыл зерттеп, құпиясын физика-математикалық әдіспен ашқан әлемдегі тұңғыш физик Мағрипа Жылқыбаеваның туғанына 75 жыл. Алтын адамның күміс зереншесіндегі 26 таңбасын оптика ілімі арқылы зерттеумен айналысқан ғалым еліміздегі және шет елдердегі 1000-нан астам жартас жазуларының, көне каллиграфиялық суреттердің шифрын ашып, артына мол мұра қалдырған.

Қазанның 15 күні Алматыдағы Ұлттық кітапханада Мағрипа Шөжеғұлқызының ғылыми мұрасына арналған халықаралық конференция өтті. Шара аясында Мағрипа Жылқыбаеваның «Алтын адамның аманаты. Есік қорғанының жаһандық құпиясы», «Алтын адамның мұрасы. Сақ қорғандарының құпия тілі – 300 мың жылдық өмірнаме» және «Құпия күштер құдіреті» деп аталатын үш томдық еңбегінің тұсаукесері өтті.

Жиынды Жапонияның қоғам қайраткері Имайо Юджи ашып, Мағрипа Жылқыбаеваның ғылыми мұрасының Жапония үшін маңызы ерекше екенін атап айтты. «Жапонияда ежелгі дәуірде Шйотоку Тайши деген мемлекет қайраткері болған. Мағрипа Шөжеғұлқызының еңбектерінде Алтын адамның жапон өркениетіне қатысы туралы мәні терең, құнды деректер көп» дей келе, ғалымның мұрасы Күншығыс еліне кеңінен насихатталатынын айтты.

Физик ғалымның еңбектерін зерттеуші қаламгер Болат Шарахымбай: «Мағрипа Жылқыбаева – кванттық физика ғылымы арқылы әлемде тұңғыш рет Есік қорғанынан табылған Алтын адам мұрасы бойынша протодәуірдегі алғашқы адамзат тілінің расшифровкасын жасап, осы сала бойынша 25 том кітап жазған ғалым. Адамзат баласының елу мың жылдық арғы тарихына бойлап, байырғы жаһандық тұлғалар өмірін суреттеп, ежелгі дамыған өркениеттердің ғажайып құпиясын бүгінгі күнге жеткізген бірегей зерттеуші. Анау қазақ даласынан бірінен соң бірі табылып жатқан Алтын адамдардың Планеталық деңгейдегі ерекшеліктерін зерттеу арқылы Сақ қорғандары мен Көк Түрік пирамидаларының құпиясын тұңғыш ашқан оқымысты. Міне, қолға тиіп отырған үш томдықтың «Алтын адамның мұрасы» және «Алтын адамның аманаты» аталатын 2, 3-ші кітаптары осы тақырыпқа арналады» дей келе, «Өкінішке орай, ғылымда осындай ерліктің үлгісін көрсеткен ғалымның көзінің тірісінде бір де бір кітабы жарық көрмепті. Сонда өз таланттарын бағалауға, қолдау көрсетуге тиіс мемлекет қайда қарап отыр?» деп сөзін түйіндеді.

Қазақстан Жазушылар Одағы төрағасының орынбасары, профессор Бауыржан Жақып физик ғалымның қазақтың атын әлемге танытқан ұлы жырау Жамбыл Жабаевтың елге беймәлім болып келген құпия қырларын ғылыми тұрғыдан зерттеп жазған «Құпия күштер құдіреті» деп аталатын көлемді кітабына жоғары баға беріп, ғылымда бұрын-соңды болмаған тың дүние екенін атап айтты.

Жиында баяндама жасаған «Нұрлы әлем» баспасының басшысы Жарылқасын Дәулет «Петроглифтерді, көне заман жәдігерлеріндегі шифрлы жазуларды кванттық оптиканың көмегімен оқу – Мағрипа Жылқыбаеваның əдісі болып табылады» дей келе, ғалымның жаңадан шыққан үш томдығының энциклопедиялық маңыздылығына тоқталды. Сондай-ақ, Қазақстан-Жапония Адам ресурстарын дамыту орталығының директоры Жанар Оразғалиева, Есік қаласынан арнайы келген Қазақстанның құрметті журналисі Шаяхмет Құсайынұлы, жазушы Орысбай Әбділдаұлы сөз сөйлеп, Мағрипа Жылқыбаева еңбектерінің ерекшелігіне тоқталып, ғалымның азаматтық тұлғасы туралы естеліктер айтты.

Жиынды жүргізген жазушы Ертай Айғалиұлы әлемде тұңғыш рет ежелгі дәуірден жеткен құпия жазу үлгілерін, таңбаларды кеңістік бойынша оқудың əдісін тапқан ғалым Арасандағы және Іле бойындағы Будда жазуларын, Орта Азия мен Жетісу жартастарындағы көне таңбалар мен петроглифтерді дешифрлеген Мағрипа Жылқыбаева мұрасының мемлекетіміздің болашағы үшін маңыздылығына тоқталды.

Шара аясында кванттық физика арқылы әлемде тұңғыш рет прото дәуірдегі алғашқы адамзат тілінің расшифровкасын жасаған жаратылыстанушы ғалым еңбектеріне арналған «Ғылым-ғұмыр» атты кітап көрмесі ұйымдастырылып, «Алтын адам жазуының құпиясын ашқан ғалым» деп аталатын бейнетүсірілім көрсетілді.

Осы күні Алматы облысы Жамбыл ауданында Мағрипа Жылқыбаева атындағы «Алтын адам» ғылыми музейі ашылды. Лента қию рәсіміне Жапонияның бірінші дәрежелі архитекторы Имайо Юджи мен Қазақстан Республикасына Еңбек сіңірген метро құрылысшысы, Мағрипа Жылқыбаеваның шәкірті Базар Самаликов қатысты. Салтанатты жиында Такэда Масано, Амано Тэцуя, Канджи Фудзий сияқты Жапонияның көрнекті ғалым-профессорларының жеделхаттары оқылып, жазушылар, дипломаттар мен халықаралық ұйым өкілдері, өңір басшылары сөз сөйледі. Ғалым мұрасын жинап, баспаға ұсынған «Жапония-Еуразия» ұйымының мүшесі Шарафат Жылқыбаева «Нұрлы әлем» баспасынан жарық көрген Мағрипа Шөжеғұлқызының кітаптарын Жамбыл орта мектебіне тарту етті. Сондай-ақ, Алтын адам жайында жазылған Мағрипа Жылқыбаеваның еңбектері республикалық және Алматы қалалық кітапханаларына да табысталды.

Тегтер:

ҰҚСАС ЖАҢАЛЫҚТАР

Талғат АЙТБАЙҰЛЫ 11:00
"Жабық тақырып жөніндегі ашық әңгіме"
Бифат ЕЛТАЕВА 23.11.2020, 14:38
Алтын адамның алтынын сақтап, бас сүйегін қайда жібердік?
Айжан БҮРКІТБАЕВА 20.11.2020, 03:30
Гиннесс рекордтарын жүзіммен жаулаған бағбанды мемлекет неге қолдамайды?
Сайт әкімшілігі 18.11.2020, 16:15
Серік Сәпиевтің әкесі қайтыс болды
Сайт әкімшілігі 17.11.2020, 17:26
Жезқазғанда Алаша хан мен Жошы ханның кесенесі қараусыз жатыр
Сайт әкімшілігі 17.11.2020, 10:24
Қош бол, "Б"

Аңдатпа


  • «Жас Алаштың» себепкер болуымен көп балалы ана жер алды
    23.11.2020, 11:20
  • Құны 68 мың теңгелік бетперденің қандай мақсатта алынғаны белгілі болды
    12:41
  • Үгіт-насихат материалдарын "Жас Алашқа" ұсыну тәртібі туралы мағлұмат
    23.11.2020, 18:42
  • Семинарға сенбеңіз, қаржылық сауаттылық туралы оқытқан алаяқ ұсталды
    23.11.2020, 10:49
  • Ауыз шаюға арналған сұйықтық коронавирусты емдей ме?
    23.11.2020, 09:56