Қазақ азаматтарының паспортында барыс бейнесі пайда болады
ҚР Ішкі істер министрлігі қазақстандық паспорттың қорғаныс деңгейін арттыру бағытында жұмыс жүргізіп жатқанын хабарлады.
Бұл туралы ІІМ басшысының міндетін атқарушы Бауыржан Аленов мәлім етті.
Сөз сөйлеу барысында ол жаңартылған Қазақстан паспортының дизайнын көрсетіп, онда барыс бейнесі болатынын айтты.
– Паспорт барлық халықаралық стандарттарға сай. Онда қажетті барлық қорғаныс элементтері бар. Қазір біз қосымша қауіпсіздік деңгейлерін енгізу мәселесін пысықтап жатырмыз, - деді Аленов.
Жаңа үлгідегі паспорттың таныстырылымында таңбадағы барыс бейнесі анық көрініп тұр. Бұл – Қазақстанда құжаттарды қорғауға арналған жаңа, заманауи технологиялар енгізіліп жатқанын көрсетеді.
Сондай-ақ Бауыржан Аленов ІІМ Қауіпсіздік кеңесінің отырысында берілген тапсырмаларды орындап жатқанын мәлімдеді. Атап айтқанда, ведомство көші-қон саласындағы ақпараттық жүйелерді интеграциялау бойынша шаралар қабылдайды. Оның айтуынша, көші-қонды бақылауды күшейту мен процестерді жетілдіру ІІМ-нің басым бағыттарының бірі болып қала береді.
Сондай-ақ ол қазақстандықтар визасыз 43 елге еркін бара алатынын атап өтті.
Бұған дейін ҚР Сыртқы істер министрлігінің ресми өкілі Айбек Смадияров Қазақстанға кіру талаптарының күшеюі мүмкін екенін айтқан болатын.