Ақтөбе облысында төбелес салдарынан жасөспірім қаза тапты
Оқиға Шалқар қаласында болған. Қазіргі уақытта барлық күдіктілер ұсталды
Бұл туралы Kazinform жазды.
Полицияның мәліметінше, төбелес түнгі уақытта орын алған. Жастар арасындағы жанжал барысында 17 жастағы бозбала көз жұмған. Аталған факті бойынша қылмыстық іс қозғалды.
— Қақтығысқа қатысқан барлық тұлғалар анықталып, полиция бөліміне жеткізілді. Олардың әрекеттеріне қолданыстағы заңнамаға сәйкес құқықтық баға беріледі. Тергеу барысы бақылауда. Кінәлілер заң аясында жауапкершілікке тартылады, - деп хабарлады облыстық полиция департаментінің баспасөз қызметі.
Ақтөбе облыстық денсаулық сақтау басқармасының мәліметінше, оқиға орнына жедел жәрдем шақырту түспеген. Белгісіз адамдар ес-түссіз жатқан жасөспірімді ауруханаға жеткізген. Дәрігерлер оның қайтыс болғанын ғана тіркеп, бұл туралы полицияға хабар берген.
Еске салайық, 2024 жылдың қыркүйегінде Ақтөбе облысындағы ауылдардың бірінде болған төбелестен кейін 9-сынып оқушысы көз жұмған еді.