Ақтөбе-Шымкент тасжолындағы трагедия: төрт адамның өліміне қатысты іс қайта қаралады
Ақтөбе облыстық соты өлімге әкеп соққан жол апатына кінәлі деп айыпталған жүк көлігінің жүргізушісі Рамазан Инфуровқа қатысты ақтау үкімінің күшін жойды. Сол апатта үш кішкентай бала мен олардың әкесі қаза тапқан болатын. Енді алқабилерді іріктеу кезіндегі өрескел заң бұзушылықтарға байланысты іс қайта қаралатын болды.
Бұл туралы hronika.kz хабарлайды.
Қайғылы оқиға 2023 жылдың ақпанында Ақтөбе-Шымкент тасжолының 938-шақырымында орын алған. Сабина Жақсылықованың отбасы тойдан қайтып келе жатқанда, олардың Mitsubishi Montero Sport көлігі Volvo жүк көлігімен соғысқан. Әйелдің күйеуі оқиға орнында тіл тартпай кетсе, үш баласы алған жарақаттарынан кейінірек көз жұмған.
Бастапқыда тергеу органдары Сабина Жақсылықованың өзін жауапқа тартпақ болған. Алайда 2024 жылы сот әйелді толықтай ақтап, жүк көлігінің көріну мүмкіндігі шектеулі аймақта қарсы бағытқа шығып кеткенін анықтады. Осыдан кейін айып жүк көлігінің жүргізушісі Рамазан Инфуровқа тағылды.
2026 жылдың 16 наурызында алқабилер соты үкім шығарды: Инфуровтың кінәсі дәлелденбеді деп танылып, ол сот залынан босатылды. Бірақ прокуратура мен жәбірленуші тарап бұл шешімге наразылық білдіріп, апелляциялық шағым түсірді.
Үкім неге жойылды?
Апелляциялық алқа алқабилер құрамының өрескел заң бұзушылықтармен жасақталғанын анықтады:
Алқабилердің бірі іріктеу кезінде «көшеде өскенін және сотталушы кінәлі болса да, болмаса да, әрқашан ақтау жағында дауыс беретінін» ашық мәлімдеген.
Тағы бір қатысушы процесске қатысқысы келмейтінін айтып, ант беруден үзілді-кесілді бас тартқан. Ол тек судья жауапкершілік туралы ескерткеннен кейін ғана ант берген.
«Үміткерлердің бұл мәлімдемелері көпшілік алдында жасалды. Алайда сот оларды істен шеттету шараларын қабылдамаған. Мұндай мінез-құлық олардың алқаби міндеттерін атқаруға дайын еместігін көрсетеді», - делінген облыстық соттың қаулысында.
Алқа іс нәтижесіне жанама түрде мүдделі болуы мүмкін адамдардың процесске жіберілгені туралы қорытындыға келді.
Енді не болады?
Рамазан Инфуровқа қатысты ақтау үкімі жойылды. Іс Ақтөбе облысының қылмыстық істер жөніндегі мамандандырылған ауданаралық сотына алқабилердің жаңа құрамымен қайта қарауға жіберілді.
Сондай-ақ, сот бұған дейін «тергеуді нашар жүргізгені үшін» полиция мен прокуратураға қатысты шығарылған жеке қаулының да күшін жойды. Енді мемлекеттік органдар апатқа қатысушылардың кінәсін немесе кінәсіздігін қайтадан дәлелдеуі тиіс.