Алматы облысында кәмелетке толмаған қызды зорлау ісі бойынша екі адам ұсталды
Алматы облысында жасөспірім қыздың топтық зорлау туралы мәлімдемесінен кейін екі күдікті ұсталды.
Полицияның мәліметінше, ағымдағы жылдың 19 наурызында 16 жасқа толмаған адаммен жыныстық қатынас жасау фактісі бойынша қылмыстық іс қозғалған.
Жедел-іздестіру шаралары барысында күдіктілердің тобы анықталып, олардың екеуі ұсталып, уақытша ұстау изоляторына қамалған. Қалған күдіктілерге қатысты тергеу әрекеттері жүргізілуде.
— Қазіргі таңда барлық қажетті тергеу шаралары жүргізілді. Барлық тараптардың уәждері мұқият тексеріліп жатыр. Жәбірленушіге қандай да бір қысым немесе қауіп жоқ, — деп хабарлады Алматы облыстық полиция департаментінің баспасөз қызметі.
Полиция өкілдерінің айтуынша, істі жан-жақты әрі толық тергеу үшін қылмыстық іс материалдары облыс орталығының тергеушілеріне берілген. Іс бойынша арнайы тергеу-жедел тобы құрылған.
Қазіргі уақытта оқиғаның барлық мән-жайын анықтауға бағытталған тергеу амалдары жалғасуда. Тергеу Алматы облыстық полиция департаменті басшылығының ерекше бақылауында.