Алматыдағы жол апаты: Жүргізуші күзет бақылауында емделіп жатыр
Алматыда үш адамның өмірін қиған жол апатына қатысы бар Zeekr көлігінің жүргізушісі қазір медициналық мекемеде күзет бақылауында ем қабылдап жатыр.
Полицияның мәліметінше, оның жағдайы тұрақталғанда, ол уақытша ұстау изоляторына жеткізіледі.
Жол апаты бойынша Қылмыстық кодекстің 345-бабы, 4-бөлімі бойынша қылмыстық іс қозғалды. Бұл бап бойынша ең қатаң жаза – 10 жылға дейін бас бостандығынан айыру.
«Оқиғаға қатысқан және оның қатысы бар барлық тұлғалар анықталды. Әрқайсысына әкімшілік іс қозғалды, материалдар сотқа жіберілді, көліктер айып тұрағына қойылды. Ешкім жауапкершіліктен қаша алмайды», - деді Алматы ПД бастығының орынбасары Рустам Шарибаев.
Айта кетейік, Алматыда әл-Фараби даңғылында болған жол апаты қоғамда үлкен резонанс тудырды. Ресми дерек бойынша, апат салдарынан үш адам қаза тапқан.
Жол апаты 21 наурызға қараған түні әл-Фараби даңғылы мен Меңдіқұлов көшесінің қиылысында болған.
Алдын ала мәліметке сәйкес, Zeekr көлігі қарсы жолаққа шығып, Mercedes автокөлігімен бетпе-бет соғысқан.
Салдарынан:
– 29 жастағы жүргізуші;
– 22 және 20 жастағы екі жолаушы көз жұмды.
Ал Zeekr жүргізушісі түрлі жарақатпен ауруханаға жеткізілген.