ERG-дегі мемлекеттік үлес «Самұрық-Қазынаға» берілді
Қазақстанға тиесілі Eurasian Resources Group (ERG) компаниясындағы 40 пайыздық мемлекеттік үлес «Самұрық-Қазына» ұлттық әл-ауқат қорының меншігіне өткен болуы мүмкін.
Бұл туралы өз дереккөздеріне сілтеме жасаған қаржы сарапшысы Арман Батаев мәлімдеді.
Оның айтуынша, 2026 жылғы 4 тамызда Қаржы министрлігінің Мемлекеттік мүлік және жекешелендіру комитеті ERG-дегі мемлекеттік акциялар пакетін «Самұрық-Қазына» қорына берген.
Алайда бұл ақпаратты жариялау сәтінде мәмілені Қаржы министрлігі, «Самұрық-Қазына» немесе ERG ресми түрде растаған жоқ. ERG-дің ресми сайтында да компанияның 40 пайыздық үлесі Қазақстан үкіметіне тиесілі екені көрсетілген.
Арман Батаев маусым айында «Самұрық-Қазына» қоры республикалық мүлікке айырбас ретінде 1,4 млрд доллар көлемінде өз акцияларын орналастыруды жоспарлап отырғанын хабарлағанын еске салды. Сол кезде сарапшы әңгіме дәл ERG-дегі мемлекеттік үлес туралы болуы мүмкін деген болжам айтқан.
Ал Metals & ESG Trends Telegram арнасы кейін бұл акциялар қордың еншілес құрылымы – «Тау-Кен Самұрыққа» берілуі ықтимал екенін жазған. Дегенмен мұндай шешім де әзірге ресми жарияланған жоқ.
Егер бұл ақпарат расталса, мемлекеттік бақылау сақталады. Өйткені «Самұрық-Қазынаның» жалғыз акционері – Қазақстан Үкіметі. Өзгеріс тек акцияларды тікелей иеленушіде болады: оларды енді Қаржы министрлігі емес, мемлекеттік қор басқаратын болады.
ERG туралы
Eurasian Resources Group (ERG) – табиғи ресурстарды өндіру және өңдеумен айналысатын халықаралық тау-кен және металлургия тобы. Компания Азия, Еуропа, Африка және Америкада жұмыс істейді. Онда шамамен 67 мың адам еңбек етеді.
Қазақстанда ERG құрамына:
«Қазхром»,
Соколов-Сарыбай кен-байыту өндірістік бірлестігі (ССКӨБ),
«Қазақстан алюминийі»,
Қазақстан электролиз зауыты,
Еуразиялық энергетикалық корпорация,
«Шұбаркөл көмір» және басқа да кәсіпорындар кіреді.
Топ феррохром өндіру бойынша әлемдегі жетекші компаниялардың бірі саналады әрі Қазақстанда жоғары сапалы алюминий өндіретін жалғыз кәсіпорын болып табылады.
«Самұрық-Қазына» ұлттық әл-ауқат қоры 2008 жылы стратегиялық мемлекеттік активтерді басқару үшін құрылған. Қордың портфеліне мұнай-газ, атом өнеркәсібі, тау-кен металлургиясы, энергетика және көлік-логистика салаларындағы ірі компаниялар кіреді.
Ал «Тау-Кен Самұрық» – қор құрамындағы тау-кен компаниясы. Ол алтын, мыс, қорғасын-мырыш, сирек және сирек жер металдары кен орындарын игеру жобаларын жүзеге асырады.