Фельдшер Ұлдана Мырзуанның өліміне қатысты сотта куәгерлерден жауап алынды
Фельдшер Ұлдана Мырзуанның қазасына қатысты қылмыстық істі қарау жалғасып жатыр. Бүгін сотта оқиға кезінде кондоминиум нысанының сенімді өкілі болған куәгерден жауап алынды.
Сот отырысы басталмас бұрын куәгер өзін бейнежазбаға түсіруге тыйым салуды сұрады. Судья оның өтінішін қанағаттандырып, куәгерді видеоға түсіруге рұқсат бермеді.
Жауап алу кезінде куәгер үйдің техникалық жағдайы, құжаттары және ғимаратты тексеру тәртібі туралы түсінік берді. Оның айтуынша, 2017 жылы жүргізілген техникалық тексеру кезінде ғимарат конструкцияларының тозу деңгейі шамамен 31 пайыз болған. Жалпы жағдайы қанағаттанарлық деп бағаланған.
Куәгер сонымен қатар үйді апта сайын тексеріп отырғанын және анықталған кемшіліктерді жазбаша түрде тіркегенін айтты. Алайда тексеру нәтижелері бойынша ресми актілер жасалмаған.
Сот отырысында істің мән-жайлары бойынша куәгерлерден жауап алу жалғасып жатыр.