Германия Қорғаныс министрлігінің басшысы Киевке сапармен барды
Германияның қорғаныс министрі Борис Писториус 11 мамыр күні Киевке барды. Бұл сапар алдын ала жарияланбаған, деп хабарлайды dpa агенттігі.
Сапар барысында Писториус Украина үкіметі өкілдерімен екі ел арасындағы қару-жарақ өндірісі саласындағы ынтымақтастықты кеңейту мәселесін талқыламақ.
Министрдің айтуынша, Германия мен Украина арасындағы стратегиялық серіктестік аясындағы әскери ынтымақтастықты күшейту — сапардың басты мақсаты.
«Германия мен Украина – стратегиялық серіктестер. Бұл ынтымақтастық екі тарапқа да тиімді. Соның нәтижесінде көптеген жаңа жобалар пайда болып жатыр», - деді Писториус.
Оның сөзінше, басты назар әртүрлі қашықтықтағы заманауи қару жүйелерін бірлесіп әзірлеуге аударылады. Оның ішінде алыс қашықтыққа соққы жасауға арналған deep strike дрондары да бар.
Германия үкіметі жаңа неміс-украин бірлескен кәсіпорындарын құруға мүдделі екенін мәлімдеді.
«Біз бұл жерде украиндардың майдандағы тәжірибесінен пайда көріп отырмыз», — деді Писториус.
Сонымен қатар Германия билігі Украина үкіметі құрған Brave1 платформасы арқылы қару-жарақ саласындағы әзірлеушілерді қолдауды жоспарлап отыр. Бұл платформа инвестиция тарту мен әскери технологияларды сатып алуға арналған.