iPhone 18 Қазақстанда АҚШ-қа қарағанда 60%-ға жуық қымбат болып шықты
Sulpak пен Technodom дүкендері iPhone 18 Pro және Pro Max модельдеріне алдын ала тапсырыс қабылдай бастады. 256 ГБ жады бар базалық iPhone 18 Pro-ның Қазақстандағы бағасы - 849 990 теңге, ал Pro Max - 909 990 теңге.
Ал АҚШ-та Apple осы модельдерді сәйкесінше 1199 және 1299 долларға сатады. 21 қыркүйектегі ресми бағам бойынша бұл шамамен 535 мың және 580 мың теңге. Осылайша, Қазақстандағы баға АҚШ-пен салыстырғанда:
🔺iPhone 18 Pro үшін - 314,6 мың теңгеге немесе 58,8%-ға қымбат;
🔺iPhone 18 Pro Max үшін - 329,9 мың теңгеге немесе 56,9%-ға қымбат.
Ал Sulpak-та 2 ТБ нұсқаларының бағасы 1,7 млн және 1,77 млн теңгеге жетеді. Бұл АҚШ-тағы бағадан шамамен 58%-ға жоғары. АҚШ-тағы бағаларға сатылым салығы кірмейтінін ескеру керек. Дегенмен оған салықты қосқанның өзінде айырмашылық толық жойылмайды. Мысалы, Испанияда 21% ҚҚС бағаға енгізілген. Онда iPhone 18 Pro 256 ГБ шамамен 753 мың теңге, ал Pro Max - 829 мың теңге тұрады. Қазақстандағы алдын ала тапсырыс бағасы бұдан тағы 10–13%-ға жоғары.
Шетелден iPhone әкеліп, ақша үнемдегісі келетіндер үшін тағы бір маңызды жайт бар. Қазақстандық SIM-картаны салу жеткіліксіз - смартфонның IMEI-коды верификациядан өтуі керек.
Импортпен айналысатын компаниялар бұл рәсімді өздері жүргізеді. Ал смартфонды жеке алып келген адам оның заңды түрде әкелінгенін растауы қажет. Егер IMEI верификациядан өтпесе, құрылғының ұялы байланыс желісіне қосылуы бұғатталуы мүмкін.