Қазақстанның мұнай өңдеу зауыттары Ресейге бірде-бір партия АИ-92 бензинін жібермеген
Қазақстанның мұнай өңдеу зауыттары 2026 жылы Ресейге АИ-92 маркалы бензин жеткізбеген.
Бұл туралы Қазақстанның Энергетика министрлігі ТАСС агенттігінің сауалына берген жауабында мәлімдеді.
Министрліктің хабарлауынша, жанармай экспорты тиісті халықаралық келісімдерге қол жеткізілгеннен кейін ғана мүмкін болады. Бұл ретте басты шарт – Қазақстанның ішкі нарығын жанармаймен толық қамтамасыз ету.
«Осыған байланысты 2026 жылы Қазақстан Республикасының мұнай өңдеу зауыттарынан Ресей Федерациясына АИ-92 маркалы автомобиль бензині жөнелтілген жоқ», – деп хабарлады Энергетика министрлігі.
Тамыз айының соңында Reuters саладағы төрт дереккөзге сілтеме жасап, Қазақстанның ірі мұнай өңдеу зауыттары шілде және тамыз айларында Ресейге АИ-92 бензинін экспорттауға бөлінген квоталарды пайдаланбағанын жазған еді. Бұған ықтимал себептердің бірі ретінде Қазақстанның ішкі нарығында жанармай тапшылығы туындау қаупі аталды.
Қазір Қазақстанда бензинді автомобиль, теміржол және өзге де көлік түрлерімен елден шығаруға тыйым салынған. Бұл шектеу ішкі нарықты жанармаймен қамтамасыз ету және бағасы жоғары көрші елдерге отынның заңсыз шығарылуына тосқауыл қою мақсатында енгізілген.
Тек көлік құралдарының зауыттан орнатылған штаттық жанармай бактарындағы бензинге бұл шектеу қолданылмайды.