ІІМ қазақстандықтардың деректерін сатушыны іздеп жатыр
ҚР Ішкі істер министрлігі желіде азаматтардың дербес деректерінің тарап кетуі мен сатылуы мүмкін деген ақпаратқа қатысты пікір білдірді.
Ведомство өкілдері тексеру жүргізіліп үлгергенін мәлімдеді. Министрліктің мәліметінше, eGov порталына заңсыз кіру (бұзу) деректері тіркелмеген.
Дегенмен, деректерді сату туралы хабарландырудың өзі назардан тыс қалған жоқ — қазіргі уақытта құқық қорғау органдары бұл базаның қайдан шыққанын және жарияланымның артында кім тұрғанын анықтап жатыр.
«Хабарландыруды орналастырған тұлғаны, деректердің шығу көзін, сондай-ақ оларды заңсыз алуға және таратуға қатысы бар барлық адамдарды анықтау үшін барлық қажетті шаралар қабылдануда», - деп хабарлады ІІМ.
Министрлік дербес деректерді қорғауға ел Конституциясымен (21-бап) кепілдік берілгенін еске салып, оқиғаға қатысты қатаң шара қолдануға сөз берді.
«Барлық қатысы бар тұлғаларды анықтау үшін барлық қажетті шаралар қабылданады. Ешкім де жауапкершіліктен қашып құтыла алмайды. Бұл жұмыс ІІМ-нің ерекше бақылауында», - деп түйіндеді ведомство.
Айта кетейік, бұған дейін 15 млн қазақстандықтың дерегі тарағаны туралы мәлімет шыққан болатын.