Өңір

Қарағандының қос кәсіпорны ТМД-ның халықаралық сапа сыйлығына ие болды

Қарағанды облысындағы екі кәсіпорын өнім мен қызмет көрсету сапасы саласындағы жоғары жетістіктері үшін ТМД-ның халықаралық сыйлығымен марапатталды.

Фото: Қарағанды облысы әкімдігі

Бұл марапат – отандық өндіріс орындарының бәсекеге қабілеттілігін, технологиялық әлеуетін және сапа талаптарына сай жұмыс істеу деңгейін танытатын маңызды жетістік.

Салтанатты рәсім Қырғызстанда Стандарттау, метрология және сертификаттау жөніндегі мемлекетаралық кеңестің отырысы аясында өтті. Жиында Достастық елдеріндегі сапа менеджментін дамытуға, өндіріс тиімділігін арттыруға және кәсіпорындардың халықаралық талаптарға сәйкестігін бағалауға айрықша мән берілді.

Өңірлік кәсіпкерлер палатасының мәліметінше, байқау қорытындысы бойынша "НПО Дефектоскопия" ЖШС халықаралық сыйлықтың лауреаты атанды. Компания мұнай-газ, тау-кен өндіру, металлургия және энергетика салаларындағы өндірістік нысандарды диагностикалау мен техникалық бақылау қызметтерін көрсетеді. Кәсіпорынның жұмысы өндірістік қауіпсіздікті қамтамасыз етуге, жабдықтардың жай-күйін бағалауға және ықтимал ақаулардың алдын алуға бағытталған. Бұл бағыттағы дәлдік пен жауапкершілік өндіріс орындарының үздіксіз жұмыс істеуі үшін аса маңызды.

Фото: Қарағанды облысы әкімдігі/Сапа сыйлығы

 

Ал "Сарыарқа" арнайы экономикалық аймағында орналасқан "Бёмер Арматура" ЖШС сыйлықтың дипломанты атанды. Кәсіпорын шарлы крандар өндіруге маманданған. Оның өнімдері өнеркәсіптік нысандардағы инженерлік және технологиялық жүйелерде қолданылады. Өндірістік үдерісте сапа талаптарын сақтау мен өнімнің сенімділігін қамтамасыз ету компания қызметінің негізгі бағыттарының бірі саналады.

Айта кетейік, екі кәсіпорын да халықаралық байқауға Қазақстандағы ұлттық іріктеу кезеңінен сүрінбей өтіп, ел атынан қатысу құқығына ие болған. Бұл олардың өз салаларындағы жұмыс сапасы мен өндірістік әлеуетінің жоғары бағаланғанын көрсетеді.

ТМД-ның халықаралық сапа сыйлығы заманауи басқару тәсілдерін енгізетін, инновациялық технологияларды тиімді пайдаланатын және халықаралық стандарттарға сай өнім шығаратын кәсіпорындарға беріледі. Байқау өндіріс пен қызмет көрсету саласында сапа мәдениетін қалыптастыруды, озық тәжірибені таратуды және кәсіпорындардың бәсекеге қабілеттілігін арттыруды көздейді.

Қарағанды облысы кәсіпорындарының бұл жетістігі өңірдің өнеркәсіптік әлеуетін тағы бір мәрте танытып, отандық өндірістің халықаралық деңгейде мойындалуына жол ашты.

Сайт Әкімшілігі
Тегтер: қарағанды