Тоқаев Ресей мен Украина қақтығысын реттеудің жолын ұсынды
Қазақстан Президенті Қасым-Жомарт Тоқаев Ресей мен Украина арасындағы қарулы қақтығысқа қатысты ұстанымын білдіріп, соғысты саяси-дипломатиялық жолмен реттеу қажеттігін айтты.
Мемлекет басшысының пікірінше, ұзаққа созылған текетірестің әскери шешімі жоқ, сондықтан тараптар келіссөз үстеліне қайта оралуы қажет.Президенттің айтуынша, Қазақстан бұл жағдайды әуел бастан екі егемен мемлекет арасындағы қақтығыс ретінде бағалап келеді. Сонымен бірге еліміз Украина халқына, оның ұлттық болмысына, мәдениеті мен тіліне әрдайым құрметпен қарайды. Мемлекет басшысы қазіргі жағдайдың күрделілігін ескере отырып, әскери әрекеттерді тоқтатуға бағытталған кез келген бастамаға ерекше мән беру керек екенін жеткізді.
Қасым-Жомарт Тоқаевтың пікірінше, бүгінгі жағдайда ең орынды қадамдардың бірі – атысты уақытша тоқтатып, бұрын белгілі бір нәтижелерге қол жеткізілген келіссөз алаңын қайта жандандыру. Оның айтуынша, Ыстамбұл форматындағы келіссөздер барысында тараптар бірқатар маңызды мәселелер бойынша өзара түсіністікке жақындай алған. Сондықтан дәл осы тәжірибе болашақ бейбіт келісімнің негізіне айналуы мүмкін.
Президент қақтығысты бейбіт арнаға бұру үшін ірі мемлекеттердің қауіпсіздік кепілдіктері маңызды рөл атқаратынын да атап өтті. Оның пікірінше, тұрақты бейбітшілікке қол жеткізу тек өзара сенім мен халықаралық міндеттемелердің сақталуына байланысты болады.
Сонымен қатар Мемлекет басшысы Қазақстанға осы мәселеде арағайындық жасау жөнінде түрлі ұсыныстар бірнеше рет түскенін айтты. Алайда ол Қазақстан мұндай миссияны өз мойнына алмайтынын жеткізді. Президент Ресейдің халықаралық саясаттағы орны ерекше мемлекет екенін айтып, оның күрделі мәселелерді делдалдардың қатысуынсыз-ақ тікелей келіссөздер арқылы шеше алатынына сенім білдірді.
Қасым-Жомарт Тоқаев соғыстың созылуы ең алдымен қарапайым адамдарға ауыр зардап әкеліп отырғанына назар аударды. Оның сөзінше, майдан даласында көз жұмып жатқан жастар – Ресей мен Украинаның болашағы. Сондықтан қантөгісті тоқтату тек саяси міндет емес, адам өмірін сақтап қалуға бағытталған гуманитарлық қажеттілік болып саналады. Президент қақтығыстың жалғасуы екі елдің де ұзақ мерзімді дамуына кері әсер ететінін айтып, барлық тарапты бейбіт шешім іздеуге шақырды.Мемлекет басшысы сөзінің соңында Қазақстанның Ресеймен арадағы қарым-қатынасына да тоқталды. Ол Астана Мәскеумен стратегиялық серіктестік пен одақтастық байланыстарды сақтауды және одан әрі дамытуды маңызды бағыттардың бірі ретінде қарастыратынын мәлімдеді.
Президенттің айтуынша, Қазақстан халықаралық алаңдарда Ресейге қатысты осы ұстанымын ашық айтып келеді және көрші мемлекетпен өзара сенімге негізделген ынтымақтастықты жалғастыруға мүдделі. Сонымен қатар өңірлік тұрақтылықты сақтау, қауіпсіздікті нығайту және бейбітшілікке қол жеткізу Қазақстан сыртқы саясатының өзгермейтін басымдықтарының бірі болып қала береді.