Жемқорлық бойынша кейінгі бес жылда 44 әкім сотқа тартылған
Finprom зерттеуіне сәйкес, мемлекеттік органдар арасында сыбайлас жемқорлыққа қатысты қылмыстар бойынша сотқа тартылғандар саны жағынан әкімдіктер алдыңғы орында тұр.
Талдау Бас прокуратураның Құқықтық статистика және арнайы есепке алу комитетінің 2020–2025 жылдар аралығындағы деректеріне негізделген. Осы кезеңде жалпы 5,1 мыңнан астам адам сотта айыпталушы ретінде қаралса, олардың шамамен 3,2 мыңы – мемлекеттік құрылым қызметкерлері.
Зерттеуде әкімдіктер мен олардың құрылымдық бөлімшелері сыбайлас жемқорлық бойынша негізгі көрсеткішке ие екені көрсетілген. Соңғы бес жылда бұл органдардан 1 мыңнан астам шенеунік түрлі жемқорлық қылмыстары бойынша сот алдында жауап берген.
Сонымен қатар аталған кезеңде пара алу, қызметтік өкілеттікті асыра пайдалану және өзге де құқық бұзушылықтар бойынша 44 әкім айыпталушы атанған. Сарапшылар мұны жергілікті деңгейде бюджет қаржысы, жер телімдері және басқа да ресурстарды бөлу кезіндегі тәуекелдердің жоғары болуымен байланыстырады.