Германия тағы да ауғандарды елден шығарды

Лейпциг/Халле әуежайынан Ауғанстанға 81 адам мінген ұшақ ұшты. Олардың барлығы Германияда қылмыстық жауапкершілікке тартылып, мәжбүрлі түрде елден шығарылуы тиіс болған. Бұл туралы ARD телеарнасына Германияның ішкі істер министрі Александер Добриндт мәлімдеді. Оның айтуынша, рейсті дайындауға Германияның стратегиялық серіктестері, соның ішінде Катар да қатысқан.

Бұл — 2021 жылдың тамызында Ауғанстанда радикалды «Талибан» қозғалысы билікке келгеннен кейінгі екінші депортациялық рейс. Бірінші рейс 2024 жылдың 30 тамызында, сол кездегі ішкі істер министрі Нэнси Фезердің кезінде жүзеге асқан.

Адам құқықтарын қорғаушылар бұл рейстерді сынға алып отыр. Олар депортацияланған адамдар өз елінде азапталуы, қатыгез қарым-қатынасқа ұшырауы мүмкін екенін ескертеді.

Өткен жылы Германиядан 1361 ауған мигранты елдеріне немесе басқа мемлекеттерге депортацияланды.

Бірінші рет 2024 жылдың қыркүйегінде 28 ауған азаматы өз еліне қайтарылған болатын. Бұл бағдарлама тек сотталған адамдарға бағытталған және басқа депортациялық бастамалардан ерекшеленеді. Неміс баспасөзі бұған дейін Германияның ауған мигранттарын елден шығару жөніндегі ауқымды жоспары туралы хабарлаған. Тек 2024 жылдың өзінде Германиядан 1300-ден астам ауған мигранты депортацияланған. Олардың көбі Германиядан босқын мәртебесін алуға үміттенген.

Deutsche Welle ақпарат агенттігі Германия ІІМ-нің 2025 жылғы 8 қаңтардағы есебіне сілтеме жасай отырып, 2024 жылы Германиядан барлығы 1361 ауған мигранты депортацияланғанын хабарлады. Олардың бір бөлігі тікелей Ауғанстанға, ал қалғандары Дублин регламентіне сәйкес олардың өтінішін қарауға жауапты елдерге жіберілген.

Дублин регламенті — Еуропалық Одаққа мүше мемлекеттер арасында босқын мәртебесін беру туралы өтініштерді қарау тәртібін реттейтін құжат. Ол белгілі бір елге жауапкершілік жүктейді — яғни, өтініш берушінің ісін қай ел қарау керек екені нақты критерийлер негізінде анықталады.

Неміс БАҚ-тары 2024 жылы Германиядағы жалпы депортациялар санының едәуір артқанын да атап өтті. Bild газетінің жазуынша, 2024 жылы депортация көлемі 2023 жылмен салыстырғанда шамамен 20%-ға артқан.

Германия үкіметі депортацияны күшейтуге исламистік экстремистік идеологияны ұстанатын ауған мигранттары жасаған күш қолдану әрекеттерінен кейін кіріскен. Бұл оқиғалар қоғам мен саясаткерлер тарапынан қатаң шаралар қабылдауға деген талаптарды күшейтті. Ауған мигранттарын депортациялау туралы Германия үкіметінің шешімі қылмыспен күрес және қоғамдық қауіпсіздік мәселелерін шешу мақсатын көздейді. Алайда бұл тәсіл ЕО аясындағы баспана беру мен көші-қон саясатына қатысты кең ауқымды мәселелерге де назар аудартты.

Германия бұл депортацияларды қажеттілік деп санаса да, олардың санының артуы мен сотталған адамдарға ерекше назар аударылуы ұлттық қауіпсіздік пен мигранттардың құқықтары арасындағы этикалық және гуманитарлық тепе-теңдік мәселелерін көтеріп отыр.