АҚШ Қытайға авиақозғалтқыш бөлшектерін экспорттауды уақытша тоқтатты

Бұл туралы The New York Times басылымы хабарлады. Шектеу АҚШ пен Қытай арасындағы геосаяси және экономикалық шиеленістің күшеюіне байланысты қабылданған.

Сауда министрлігі америкалық компаниялардың Қытайдың COMAC (Commercial Aircraft Corporation of China) компаниясына өнім жеткізуге мүмкіндік беретін бірнеше экспорттық лицензияны тоқтатты. Бұл шешім Қытай тарапының АҚШ-қа сирек кездесетін металлдарды экспорттауға енгізген шектеулеріне жауап ретінде қабылданып отыр.

Қытайдың заманауи C919 жолаушылар ұшағы өз елінде құрастырылғанымен, оның маңызды құрамдас бөліктері — шетелден, әсіресе АҚШ пен Франциядан жеткізіледі. Атап айтқанда, бұл ұшақта қолданылатын LEAP-1C қозғалтқышы — америкалық GE Aerospace пен француздық Safran компанияларының бірлескен өнімі.

Лицензиялардың тоқтатылуы бұл қозғалтқыштың Қытайға жеткізілуіне тікелей қауіп төндіріп отыр. Бұл Қытайдың авиациялық тәуелсіздігіне соққы болып қана қоймай, бүкіл C919 бағдарламасының болашағына күмән тудырады.

Сонымен қатар әлемдік автокөлік өндірушілер Қытайдан келетін сирек жер магниттерінің азаюына алаңдап отыр. Бұл магниттер — электр қозғалтқыштарында, генераторларда, беріліс қораптарында, қауіпсіздік белдіктерінде және басқа да маңызды компоненттерде кеңінен қолданылады.

Сала сарапшыларының айтуынша, егер жағдай жақын арада тұрақталмаса, бірнеше ірі автозауыттардың жұмысы уақытша тоқтауы мүмкін.

Қазіргі уақытта Қытай сирек жер элементтерінің әлемдік өндірісінің 90%-дан астамын бақылайды. Бұл оның жаһандық өндіріс тізбегіндегі маңызды орнын дәлелдейді және АҚШ пен Еуропа елдерін балама жеткізушілер іздеуге мәжбүрлеп отыр.

АҚШ-тың Сауда өкілі Джеймисон Грир 30 мамыр күні мәлімдеме жасап:

«Қытай шектеулерді қайта қарауға келіскенімен, бұл үдеріс өте баяу жүріп жатыр. Біз өз мүдделерімізді қорғауға мәжбүрміз», - деді.