“Конопля” өсірудің Назарбаев әулетіне қатысы жоқ - Сапаров

Журналистердің бірі бұл бастама кезінде Сенат төрағасы болған Дариға Назарбаева көтерген идеяның жалғасы емес пе деген сауал жолдады. Ауыл шаруашылығы министрі Айдарбек Сапаров мұндай байланысты үзілді-кесілді жоққа шығарды.

Оның айтуынша, бұл бастама бос жатқан жерлерді пайдалану мүмкіндігіне қызығушылық танытқан жеке компанияға тиесілі. Министрдің мәліметінше, Солтүстік Қазақстан облысының Уәлиханов ауданында қазіргі кезде игерілмей жатқан, ештеңе егілмейтін жерлер бар. Техникалық мақсаттағы кендір дәл осы аумақтарда өсірілмек.

«Компания қызығушылық танытты. Олар бұл мәселені зерделеп жатыр. Биыл техникалық конопля өсіріле ме, жоқ па — үлкен сұрақ. Мұның оларға қатысы жоқ», - деп түсіндірді Сапаров.

Техникалық конопляның атымен есірткілік құрамды өсіру мәселесі болмай ма?

Бұл сұраққа Ішкі істер министрінің орынбасары Азат Сұлтанов жауап берді. Ол техникалық конопляны өсіру және өңдеу мәселесі бойынша бақылау барынша қатаң болатынын ескертті.
Оның айтуынша, үкімет деңгейінде де осындай сұрақтар көтерілген. Сұлтанов рұқсат етілген сұрыптар тек техникалық мақсаттағы, құрамында ТГК (тетрагидроканнабинол) өте аз немесе мүлде жоқ түрлерге ғана қатысты болатынын атап өтті. Сондай-ақ ол өндірістің барлық кезеңінде, яғни өсіруден бастап өңдеуге дейін, сот-сараптама органдары тарапынан зертханалық тексерістер жүргізілетінін айтты. Бұл тыйым салынған заттардың тіпті ең аз мөлшерінің де айналымға түсуіне жол бермейді.

«Есірткілік құрамдағы конопляның бір граммы да өндіріске жіберілмейді», — деп нақтылады ол.

Сонымен қатар Сұлтанов ІІМ бұл процесті тұқым әкелуден бастап өңдеуге дейінгі барлық кезеңде бақылайтынын айтты. Төрт деңгейлі бақылау жүйесі енгізіледі, ал егер қандай да бір заңбұзушылық анықталса, өнім толықтай жойылады.

Ауыл шаруашылығы министрлігінің мәлімдеуінше, өсімдік егілетін аумақ қоршалып, күзет қойылады және бөгде адамдардың кіруіне қатаң тыйым салынады.