Ақтөбе облысында жол апатынан төрт адам қаза тапты

Облыстық полиция департаментінің мәліметінше, Ақтөбе–Орск автожолында Opel маркалы жеңіл көлік қарсы бағыттағы жолаққа шығып кетіп, DAF маркалы жүк көлігімен соғысқан.

«Жол-көлік оқиғасы салдарынан жеңіл көліктің жүргізушісі мен үш жолаушысы оқиға орнында көз жұмды», - деп хабарлады Ақтөбе облыстық полиция департаменті.

Қазіргі таңда оқиға орнында жедел-тергеу тобы жұмыс істеп жатыр. Апаттың барлық мән-жайы мен себептері анықталуда.

Айта кетейік, Солтүстік Қазақстан облысында жол апатынан үш адам көз жұмды. Алғашқы апат 7 ақпан, сенбі күні Қызылжар ауданында, Жезқазған – Петропавл автожолының бойында болған.

Toyota Camry маркалы жеңіл көлік қарсы бағытқа шығып кетіп, үлкен жылдамдықпен Shacman жүк көлігіне соғылған. Салдарынан екі көлік те өртеніп кеткен. Жүк көлігінің жүргізушісі аман қалған. Алғашында жеңіл көліктің 55 жастағы жүргізушісі қаза тапты деп хабарланған еді. Кейіннен автокөліктің ішінде тағы бір жолаушы болғаны және оның да өрттен қаза тапқаны анықталды.

Аталған дерек бойынша қылмыстық іс қозғалып, полиция жол апатының мән-жайын анықтап жатыр.

Екінші өлімге соқтырған жол-көлік оқиғасы 8 ақпан күні таңертең Мамлют ауданында тіркелді. Audi маркалы автокөлік сүт тасымалдайтын жүк көлігімен соғысқан. 24 жастағы жеңіл көлік жүргізушісі оқиға орнында көз жұмды.

«8 ақпан күні “Мамлютка – Қостанай” автожолында КамАЗ жүк көлігі мен Audi автокөлігінің қатысуымен жол-көлік оқиғасы орын алып, Audi жүргізушісі қаза тапты. Қылмыстық іс қозғалды, оқиғаның барлық мән-жайы анықталуда», – деп хабарлады СҚО полиция департаменті.

Полиция өкілдері жолдағы қайғылы жағдайлардың алдын алу үшін жүргізушілерді жол қозғалысы ережелерін қатаң сақтауға, жол жағдайын ескеруге және көліктің техникалық жай-күйін үнемі бақылауда ұстауға шақырды.