АҚШ: Демократиялық партия Байденді ресми түрде президенттіктен үміткер ретінде бекітті

17 тамызда басталған демократтар съезінде осындай шешім қабылданды. Съезд коронавирус індетіне байланысты енгізілген шектеулердің кесірінен онлайн түрінде өтті.

Байденді үміткер ретінде бекітудің ресми сипаты ғана бар, бірнеше ай бұрын бастапқы сайлауларда жеңген Байденнің кандидат атанатынына ешкімнің күмәні қалмаған еді. Ол делегаттарға алғыс айтып "[үміткер атану] мен және отбасым үшін өте үлкен мәнге ие" деді.

Демократтар съезінде бұрынғы президент Билл Клинтон сөйледі. Ол президент Дональд Трамп әкімшілігінің індетпен күрес стратегиясын сынап, президент кабинетінің жүйесіз әрекет етіп отырғанын айтты. Съезде бұрынғы мемлекеттік хатшы Колин Пауэлл да сөйледі. Ол Байденді қолдаған республикашылдар қатарын толықтырды.

Демократтар съезі өтіп жатқан шақта көші-қон мәселелері бойынша Аризона штатына барған президент Дональд Трамп Байден билікке келсе "әлемде бұрын-соңды болмаған заңсыз иммигранттар толқыны пайда болады" деді.

АҚШ-та президент сайлауы 2020 жылы қараша айында өтеді.

Telegram бізге жазылыңыз